काठमाडौं । नेपालमा सडक दुर्घटनामा पैदलयात्रीको ज्यान जाने क्रम चिन्ताजनक रूपमा बढिरहेको छ। पछिल्लो पाँच वर्षमा २ हजार ६६१ पैदलयात्रीले ज्यान गुमाएका छन्, अर्थात् औसतमा प्रत्येक दुई दिनमा तीन जनाको मृत्यु हुने गरेको तथ्यांकले देखाउँछ।

हालै ललितपुरको बालकुमारीमा जेब्राक्रसबाट सडक पार गरिरहेकी भोजपुरकी ५५ वर्षीया देवी खत्रीको भ्यानको ठक्करबाट मृत्यु भएपछि सडक सुरक्षामाथि फेरि प्रश्न उठेको छ। नियमअनुसार जेब्राक्रस प्रयोग गर्दा पनि पैदलयात्री सुरक्षित हुन नसकेको भन्दै नागरिकले सरकारको सडक सुरक्षा नीतिको आलोचना गरेका छन्।

सडक सुरक्षाका जानकारहरूका अनुसार दुर्घटना न्यूनीकरणका लागि सुरक्षित सडक, कडा कार्यान्वयन र पैदलमैत्री पूर्वाधार आवश्यक भए पनि सरकार भने ट्राफिक जरिबाना बढाउने अभियानमै बढी केन्द्रित देखिएको छ।

उनीहरूले जरिबाना असुल्नुभन्दा जेब्राक्रसमा पैदलयात्रीको सुरक्षा सुनिश्चित गर्न सरकारको प्राथमिकता हुनुपर्ने बताएका छन्।