काठमाडौं। टेकुस्थित अस्पतालमा रेबिजका कारण ४८ वर्षीय एक पुरुषको मृत्यु भएपछि काठमाडौं उपत्यकामा रेबिजको त्रास बढेको छ। घटनापछि विगतमा कुकुर वा अन्य जनावरले टोकेका तर खोप नलगाएका व्यक्तिहरू अस्पताल पुग्ने क्रम बढेको स्वास्थ्यकर्मीहरूले बताएका छन्।

नेपालमा रेबिज वर्षौंदेखि प्रमुख जनस्वास्थ्य समस्याका रूपमा रहेको छ। आधिकारिक तथ्यांक नभए पनि हरेक वर्ष करिब एक सय जनाको रेबिजका कारण मृत्यु हुने अनुमान छ। चिकित्सकहरूका अनुसार रेबिजका लक्षण देखिएपछि बच्ने सम्भावना अत्यन्त न्यून हुने भएकाले जनावरले टोकेपछि जतिसक्दो छिटो रेबिजविरुद्धको खोप लगाउनु आवश्यक हुन्छ।

सरकारी स्वास्थ्य संस्थामा निःशुल्क खोप उपलब्ध गराइए पनि कतिपय स्थानमा खोप अभाव हुने समस्या कायमै छ। स्वास्थ्य विज्ञहरूले देशभर पर्याप्त खोपको व्यवस्था गर्न, छाडा जनावरको व्यवस्थापन प्रभावकारी बनाउन तथा जनचेतना अभिवृद्धि गर्न सम्बन्धित निकायसँग आग्रह गरेका छन्।