काठमाडौं । एउटा पित्तलको परम्परागत दीप। त्यसमा झुकेर बत्ती बालिरहेका प्रमुख अतिथि। वरिपरि उभिएका उद्योगी, व्यवसायी, पूर्व नेतृत्व, सुरक्षा अधिकारी र सञ्चारकर्मी। सबैको नजर एउटै क्षणमा केन्द्रित छ। यो दृश्य कुनै साधारण उद्घाटन समारोहको मात्र होइन, नेपालको अटोमोबाइल क्षेत्रको पाँच दशक लामो यात्राको नयाँ अध्याय उद्घाटन भएको क्षण पनि हो।

राजधानीको याक एण्ड यति होटल शुक्रबार इतिहासको साक्षी बन्यो। नाडा अटोमोबाइल्स एशोसिएशन अफ नेपाल (नाडा) ले आफ्नो ५०औँ स्थापना दिवस अर्थात् स्वर्ण उत्सव मनाउँदै विगतको संघर्ष, वर्तमानको उपलब्धि र भविष्यको सम्भावनालाई एउटै मञ्चमा उभ्यायो।

कार्यक्रमको औपचारिक सुरुआत दीप प्रज्वलनबाट भयो। तर त्यो दीप केवल समारोहको औपचारिकता थिएन। त्यो पाँच दशकदेखि नेपाली अटोमोबाइल व्यवसायलाई अघि बढाउँदै आएको आत्मविश्वास, निरन्तरता र परिवर्तनको प्रतीक थियो।

यसअघि बिहानै दशरथ रंगशालाबाट सुरु भएको वाकाथनले राजधानीका सडकमा उत्सवको रौनक छरेको थियो। नाडाका पदाधिकारी, पूर्वअध्यक्ष, सदस्य कम्पनी, उद्योगी–व्यवसायी र सञ्चारकर्मीहरूको सहभागिताले अटोमोबाइल क्षेत्र केवल व्यापारको विषय नभई देशको आर्थिक गतिशीलताको महत्वपूर्ण आधार बनेको सन्देश दिएको थियो।

वि.सं. २०३२ सालमा स्वर्गीय तोलाराम दुगडले सुरु गरेको नाडाको यात्रा आज ५० वर्ष पार गरेको छ। सानो व्यावसायिक मञ्चका रूपमा सुरु भएको संस्था अहिले नेपालको अटोमोबाइल क्षेत्रको सबैभन्दा प्रभावशाली छाता संगठन बनेको छ। कर नीति, भन्सार व्यवस्था, सडक सुरक्षा, विद्युतीय सवारीको प्रवर्द्धनदेखि निजी क्षेत्रका आवाज सरकारसम्म पुर्‍याउने भूमिकामा नाडा निरन्तर सक्रिय रहँदै आएको छ।

स्वर्ण उत्सवका अवसरमा विगतका अध्यक्षहरूलाई सम्मान गरियो। उनीहरूलाई सम्मान गर्नु भनेको केवल व्यक्तिलाई सम्मान गर्नु होइन, संस्थालाई आजको उचाइमा पुर्‍याउने संघर्ष र नेतृत्वलाई सम्मान गर्नु पनि थियो।

नेपाल उद्योग वाणिज्य महासंघका अध्यक्ष अन्जन श्रेष्ठको प्रमुख आतिथ्य र नाडाका अध्यक्ष सुरेन्द्रकुमार उप्रेतीको सभापतित्वमा सम्पन्न समारोहले एउटा स्पष्ट सन्देश दियो, नेपाली अटोमोबाइल उद्योग अब केवल सवारी बिक्रीको व्यवसायमा सीमित छैन; यो हरित ऊर्जा, विद्युतीय सवारी, प्रविधि र आधुनिक अर्थतन्त्रसँग जोडिएको एउटा परिवर्तनशील क्षेत्र हो।

पाँच दशकको यात्रामा नाडाले २३ वटा अधिवेशन सम्पन्न गरेको छ। २१ जना अध्यक्षले नेतृत्व सम्हालेका छन्। नाडा अटो शो, नाडा अटो न्यूज, ट्रेड डाइरेक्ट्री र सामाजिक उत्तरदायित्वका कार्यक्रममार्फत संस्थाले आफ्नो प्रभाव निरन्तर विस्तार गर्दै आएको छ।

स्वर्ण उत्सव असार १३ देखि १९ गतेसम्म सातै प्रदेशमा विविध कार्यक्रमका साथ मनाइँदैछ। यो उत्सव केवल विगतको सफलताको उत्सव मात्र होइन, आगामी ५० वर्षका लागि नयाँ ऊर्जा, नयाँ सोच र नयाँ यात्राको संकल्प पनि हो।

दीपबाट सुरु भएको त्यो क्षण अन्ततः एउटा सन्देशमा रूपान्तरित भयो, समय बदलिन्छ, प्रविधि बदलिन्छ, सवारी बदलिन्छन्; तर संस्थागत प्रतिबद्धता र साझा यात्राको मूल्य कहिल्यै पुरानो हुँदैन। “बगिरहन्छ निरन्तर, अविचलित, अविराम यात्रा। नदीझैँ, जसले चट्टानसँग ठोक्किएर पनि आफ्नो बाटो बदल्दैन; समयसँग संवाद गर्दै, परिवर्तनलाई अँगाल्दै र नयाँ क्षितिजतर्फ निरन्तर अघि बढिरहन्छ। यही यात्राको अर्को नाम हो- पाँच दशकको नाडा …

• पावेल शाही