विराटनगर । कोशी प्रदेश सरकारको बजेटलाई लिएर सत्ता गठबन्धनभित्रै विवाद चर्किएपछि समस्या समाधानका लागि कार्यदल गठन गरिएको छ।

मुख्यमन्त्री हिक्मतकुमार कार्कीको पहलमा गठन गरिएको कार्यदलले बजेट वितरणको सन्तुलनबारे छलफल गर्नेछ। तर अर्थ मन्त्रालयले बजेट ‘पीएलएमबीआईएस’ प्रणालीमा प्रविष्ट भइसकेकाले पुनर्लेखन वा संशोधन गर्ने कानुनी व्यवस्था नरहेको स्पष्ट पारेको छ।

बजेट मन्त्रीहरूको निर्वाचन क्षेत्रमा केन्द्रित भएको आरोप लगाउँदै सत्ता पक्षकै सांसदहरूले हस्ताक्षर अभियान चलाएका छन्। उनीहरूले संशोधन नभएसम्म बजेट पारित हुन नदिने चेतावनी दिएका छन्।

विवादका कारण मंगलबार बस्ने प्रदेशसभा बैठक पनि स्थगित गरिएको छ। अर्को बैठक असार १८ गतेका लागि बोलाइएको छ।