काठमाडौं । राष्ट्रिय स्वतन्त्र पार्टी (राष्ट्रिय स्वतन्त्र पार्टी) को महाधिवेशनमा ९९ केन्द्रीय सदस्य चयनका लागि विद्युतीय मेसिनमार्फत मतदान गरिने भएको छ। सभापतिमा रवि लामिछाने निर्विरोध चयन भइसकेका छन्।

निर्वाचनका लागि ८० वटा विद्युतीय मतदान मेसिन प्रयोग हुनेछन्। मतदान प्रक्रिया रामलक्ष्मण इनोभेसनद्वारा आपूर्ति गरिएका मेसिनमार्फत सञ्चालन गरिनेछ।

कम्पनीका अनुसार सबै मेसिन तयारी अवस्थामा छन् र उम्मेदवारहरूको अन्तिम नामावली प्राप्त भएपछि करिब ६ घण्टाभित्र प्रणालीमा ‘इन्ट्री’ पूरा गर्न सकिनेछ।

तर निर्वाचन आयोगले हालसम्म प्रारम्भिक नामावली सार्वजनिक नगरेको जनाइएको छ। नामावली प्रकाशनपछि दाबी–विरोध, छानबिन र अन्तिम सूची तयारीको प्रक्रिया पूरा भएपछि मात्रै मतदान सुरु हुनेछ।

पहिलो चरणमा केन्द्रीय सदस्यका लागि ४०० भन्दा बढी उम्मेदवार प्रतिस्पर्धामा छन्। त्यसपछि पदाधिकारी चयनका लागि दोस्रो चरणको निर्वाचन कार्यक्रम अघि बढाइनेछ।