काठमाडौं । संघीय संसद्अन्तर्गत प्रतिनिधिसभाको बैठक आज बिहान ११ बजे बस्दैछ। बैठकमा गृह, अर्थ, रक्षा, परराष्ट्र, ऊर्जा तथा प्रधानमन्त्री तथा मन्त्रिपरिषद्को कार्यालयसहित विभिन्न मन्त्रालय र संवैधानिक निकायका बजेटमाथि विस्तृत छलफल हुने भएको छ।

विनियोजन विधेयक, २०८३ अन्तर्गत विज्ञान, प्रविधि तथा नवप्रवर्तन मन्त्रालय, कानुन, न्याय तथा संसदीय मामिला मन्त्रालय, पूर्वाधार विकास मन्त्रालय, गृह मन्त्रालय, ऊर्जा, जलस्रोत तथा सिँचाइ मन्त्रालय, परराष्ट्र मन्त्रालय, अर्थ मन्त्रालय, रक्षा मन्त्रालय, प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोगको सचिवालय तथा राष्ट्रपति–उपराष्ट्रपतिको कार्यालयको खर्च शीर्षकमाथि सांसदहरूले धारणा राख्ने कार्यसूची रहेको छ।

बैठकमा विभिन्न सांसदहरूले सम्बन्धित मन्त्रालयहरूको बजेट रकम घटाएर एक रुपैयाँ कायम गर्नुपर्ने भन्दै खर्च कटौती प्रस्ताव पनि प्रस्तुत गर्नेछन्। विज्ञान तथा प्रविधि मन्त्रालयतर्फ गुरु प्रसाद बराल, कानुन मन्त्रालयतर्फ रमेश कुमार मल्ल, पूर्वाधार विकास मन्त्रालयतर्फ मोहम्मद इश्तियाक राई र बलावती शर्मा तथा गृह मन्त्रालयतर्फ विष्णु माया विकले खर्च कटौतीका प्रस्ताव पेश गर्नेछन्।

बैठकको अन्त्यमा सभामुखले प्रतिनिधिसभाका पूर्व सदस्य स्वर्गीय मंगल प्रसाद गुप्ताप्रति श्रद्धाञ्जली अर्पण गर्दै शोक प्रस्ताव प्रस्तुत गर्ने कार्यसूची रहेको संसद् सचिवालयले जनाएको छ।