काठमाडौं । नेपाल कम्युनिष्ट पार्टी (एमाले) को सचिवालय बैठक आज पनि बस्दैछ।

शनिबार बिहान साढे ११ बजे पार्टी अध्यक्ष तथा प्रधानमन्त्री केपी शर्मा ओली को भक्तपुरस्थित गुण्डु निवासमा बैठक बस्न लागेको हो।

एमाले सचिवालय बैठक शुक्रबारदेखि सुरु भएको थियो। बैठकमा सचिवालय सदस्यहरूले समसामयिक राजनीति, पार्टी संगठन र आगामी रणनीतिबारे धारणा राखिरहेका छन्। केही नेताहरूले अध्यक्ष ओलीले नेतृत्वबाट मार्गप्रशस्त गर्नुपर्ने धारणा समेत राखेको स्रोतले जनाएको छ।

शुक्रबार बोल्न बाँकी रहेका सचिवालय सदस्यहरूले आजको बैठकमा आफ्नो धारणा राख्ने कार्यक्रम रहेको छ। आजको बैठकमा महासचिव शंकर पोखरेल, उपमहासचिवहरू लेखराज भट्ट, रघुवीर महासेठ र योगेश भट्टराई ले आफ्नो धारणा राख्नेछन्। त्यस्तै सचिवहरू छविलाल विश्वकर्मा, पद्मा अर्याल, यामलाल कँडेल, हिक्मत कार्की, खगराज भट्ट, भानुभक्त ढकाल, राजन भट्टराई, शेरधन राई र महेश बस्नेत ले पनि आज आफ्नो धारणा प्रस्तुत गर्ने कार्यक्रम रहेको छ।

बैठकमा पार्टीको कार्यविभाजन, संगठन सुदृढीकरण तथा आगामी राजनीतिक रणनीतिबारे गहन छलफल हुने एमाले स्रोतले जनाएको छ।