काठमाडौं । नेकपा एमालेले प्रधानमन्त्री बालेन शाह नेतृत्वको सरकारप्रति कडा आपत्ति जनाउँदै “नयाँ सोच” को नाममा संसदलाई कमजोर बनाउँदै कार्यपालिकाको स्वेच्छाचारी शैली बढाइएको आरोप लगाएको छ।

प्रतिनिधिसभा बैठकमा बोल्दै एमाले सचिव तथा सांसद पदमा अर्यालले सरकारले ल्याएका अध्यादेशप्रति आपत्ति जनाउँदै तत्काल खारेज गर्न माग गरेकी छन्।

उनले हिजो अध्यादेशको विरोध गर्नेहरू नै आज त्यही बाटोमा हिँडेको भन्दै प्रश्न उठाइन् “यो राजनीतिक परिपक्वता हो कि सत्ता अनुसार बदलिएको व्यवहाररु”

अर्यालले संसद छलेर अध्यादेश ल्याइनु लोकतान्त्रिक मूल्यविपरीत भएको बताउँदै यसले कार्यपालिकाको स्वेच्छाचारिता बढाएको आरोप लगाइन्। उनका अनुसार, “नयाँ सोच” को नाममा संसदलाई पन्छाउने अभ्यास खतरनाक संकेत हो।

उनले न्यायपालिकामा समेत कार्यपालिकाको प्रभाव बढ्दै गएको भन्दै शक्ति पृथकीकरणको सिद्धान्त कमजोर पारिएको टिप्पणी गरिन्।

त्यसैगरी, विद्यार्थी संगठन र ट्रेड युनियनसम्बन्धी निर्णय तथा सुकुमबासी बस्ती हटाउने विषयमा पनि एमालेले आपत्ति जनाएको छ।

एमालेले सरकारले लोकतान्त्रिक प्रक्रिया पालना गर्न, अध्यादेश फिर्ता लिन र संसदको सम्मान गर्न माग गरेको छ।