काठमाडौं । देशभर सक्रिय रहेको पश्चिमी तथा स्थानीय वायुसँगै पूर्वी क्षेत्र नजिकको न्यूनचापीय प्रणालीका कारण आज मौसम बदली हुने भएको छ। जल तथा मौसम विज्ञान विभागका अनुसार यसको प्रभावले धेरै प्रदेशमा वर्षा र चट्याङको सम्भावना देखिएको छ।

हाल मधेश, बागमती, गण्डकी, लुम्बिनी र कर्णाली प्रदेशका पहाडी तथा हिमाली भूभागमा सामान्यदेखि बाक्लो बादल लागेको छ भने तराई क्षेत्रमा आंशिक बदली रहेको छ। कोशी र बागमती प्रदेशका केही स्थानमा हल्का वर्षा भइसकेको छ।

दिउँसो कोशी, मधेश, बागमती, गण्डकी र लुम्बिनी प्रदेशका विभिन्न स्थानमा मेघगर्जन तथा चट्याङसहित मध्यम वर्षा हुने सम्भावना रहेको छ। उच्च पहाडी तथा हिमाली क्षेत्रमा हल्का हिमपात पनि हुन सक्ने विभागले जनाएको छ।

रातिको समयमा पनि मौसम पूर्ण रूपमा सुधार नहुने देखिएको छ। विशेषगरी कोशी, मधेश, बागमती र गण्डकी प्रदेशका केही स्थानमा मेघगर्जनसहित वर्षा जारी रहने अनुमान गरिएको छ।

मौसमविद्हरूले चट्याङ, हावाहुरी र वर्षाका कारण दैनिक जनजीवन तथा यात्रामा असर पर्न सक्ने भएकाले आवश्यक सतर्कता अपनाउन सर्वसाधारणलाई आग्रह गरेका छन्।