जनकपुरधाम । जनमत पार्टीभित्र देखिएको आन्तरिक विवादका बीच संसदीय दलका नेता महेश प्रसाद यादवले मधेश प्रदेश सरकारलाई दिएको समर्थन यथावत रहेको स्पष्ट पारेका छन्।

संसदीय दलको कार्यालयमार्फत प्रदेश प्रमुखलाई पठाइएको पत्रमा पार्टीको आधिकारिक निर्णय नभएसम्म सरकारलाई दिएको समर्थन कायम रहने उल्लेख गरिएको छ। नेता यादवद्वारा हस्ताक्षरित पत्रमा औपचारिक बैठकबाट निर्णय नभएसम्म कुनै पनि व्यक्तिको दाबीलाई आधिकारिक मान्न नसकिने प्रष्ट पारिएको छ।

पत्रमा केही व्यक्तिहरूले बिना औपचारिक निर्णय समर्थन फिर्ता लिएको दाबीप्रति असहमति जनाउँदै यस्ता गतिविधिबाट भ्रम नफैलाउन आग्रह गरिएको छ। साथै, पार्टीभित्र देखिएको मतभेदलाई औपचारिक निर्णयको रूपमा नबुझ्न पनि स्पष्ट पारिएको छ।

जनमत पार्टी हाल मधेश प्रदेश सरकारमा सहभागी छ, जहाँ पार्टीका दुई मन्त्री रहेका छन्। संसदीय दलका नेता यादव अर्थमन्त्री छन् भने वसन्त कुशवाहा खेलकुद तथा समाज कल्याण मन्त्रीको जिम्मेवारीमा छन्।

यसअघि, जनमत पार्टीकै सचेतक चन्दन सिंहको नेतृत्वमा १० जना प्रदेश सभा सदस्यले नेपाली कांग्रेस नेतृत्वको मधेश प्रदेश सरकारबाट समर्थन फिर्ता लिएको दाबी गर्दै प्रदेश प्रमुखसमक्ष पत्र बुझाएका थिए।

पछिल्लो घटनाक्रमसँगै जनमत पार्टीभित्रको विवाद सतहमा आएको छ भने मधेश प्रदेश सरकारको स्थायित्वबारे अनिश्चितता बढेको देखिएको छ।