धनगढी । कैलाली जिल्लामा श्रीमतीको हत्या गरेर श्रीमानले आफूमाथि नै गोली चलाएको घटना सार्वजनिक भएको छ।

जिल्लाको गोदावरी नगरपालिका–४ अमलेशैनी गाउँमा अन्दाजी ३१ वर्षीय रामबहादुर मगरले २८ वर्षीया श्रीमती संजिता मगरको हत्या गरेका हुन्। जिल्ला प्रहरी कार्यालय कैलालीका निमित्त प्रमुख प्रहरी नायब उपरीक्षक (डिएसपी) योगेन्द्र तिमिल्सिना का अनुसार, जङ्गलमा बाख्रा चराउन गएका बेला उक्त घटना भएको हो।

प्रारम्भिक अनुसन्धानअनुसार घरायसी विवादका क्रममा मगरले आफूसँग रहेको भरुवा बन्दुक प्रयोग गरी श्रीमतीलाई गोली हानी हत्या गरेका थिए। घटनाबारे थप अनुसन्धान भइरहेको प्रहरीले जनाएको छ।

श्रीमतीको हत्या गरेपछि उनले सोही बन्दुकबाट आफैँलाई पनि गोली हानेका थिए। गम्भीर घाइते भएका उनको सेती प्रादेशिक अस्पताल मा उपचार भइरहेको छ।

हाल उनी होसमा नआएकाले घटनाको विस्तृत विवरण खुल्न बाँकी रहेको प्रहरीले जनाएको छ। मृतक महिलाको शव घटनास्थलमै राखिएको छ।