काठमाडौं । अमेरिकी राष्ट्रपति डोनाल्ड ट्रम्पले इरानमा भइरहेको अमेरिकी सैन्य अभियान चाँडै अन्त्य हुन सक्ने बताएका छन्। तर उनले यो अभियान यही हप्ता नै समाप्त नहुने स्पष्ट पारेका छन्।

ट्रम्पका अनुसार इरानको सैन्य क्षमता अहिले धेरै कमजोर भइसकेको छ। उनले इरानसँग रहेका अधिकांश शक्ति र संरचना नष्ट भइसकेको दाबी गरेका छन्।

फेब्रुअरी महिनाको अन्त्यतिर अमेरिका र इजरायलले इरानमाथि संयुक्त आक्रमण गरेपछि मध्यपूर्व क्षेत्रमा तनाव बढ्दै गएको छ। यही विषयमा ट्रम्पले रुसी राष्ट्रपति भ्लादिमिर पुटिनसँग फोनमार्फत कुराकानी गरेको बताएका छन्।

कुराकानीका क्रममा मध्यपूर्वको अवस्थाबारे छलफल भएको र पुटिनले समाधानका लागि सहयोग गर्न इच्छा देखाएको ट्रम्पको भनाइ छ। ट्रम्पले पुटिनलाई युक्रेनमा जारी युद्ध अन्त्य गराउन मद्दत गर्न सके त्यो अझ उपयोगी हुने बताएका थिए।

अमेरिकी र इजरायली आक्रमणपछि इरानका सर्वोच्च नेता अली खामेनी मारिएको दाबी गरिएको छ। खामेनीको मृत्युपछि उनका छोरा मोज्तबा खामेनीलाई इरानको नयाँ सर्वोच्च नेता चयन गरिएको बताइएको छ।

यसबीच रुसी राष्ट्रपति पुटिनले मोज्तबा खामेनीलाई बधाई दिँदै इरानसँग रूसको समर्थन र साझेदारी कायम रहने बताएका छन्।

ट्रम्पले पुटिनसँग भएको कुराकानीमा युक्रेन युद्धबारे पनि छलफल भएको जानकारी दिएका छन्। उनले उक्त युद्ध चाँडै अन्त्य हुने संकेत नदेखिएको उल्लेख गर्दै पुटिन र युक्रेनी राष्ट्रपति भोलोदिमिर जेलेन्स्कीबीच गहिरो दुश्मनी रहेको बताएका छन्।