काठमाडौं । नेपाली कांग्रेसबाट काठमाडौं क्षेत्र नं. ४ का उम्मेदवार सचिन तिमल्सिनाले निर्वाचनका क्रममा देखिएको निषेध र उत्तेजनाको राजनीतिप्रति गम्भीर चिन्ता व्यक्त गरेका छन्।

दाङ र मधेशलगायतका केही स्थानमा विभिन्न राजनीतिक दलका झण्डा जलाउने तथा दलहरूलाई निषेध गर्ने घटना सार्वजनिक भइरहेका बेला उनले यस्ता गतिविधि लोकतान्त्रिक मूल्य र मान्यताविपरीत भएको बताएका हुन्।

बूढानीलकण्ठ नगरपालिका वडा नं. २ मा घरदैलो कार्यक्रमका क्रममा स्थानीयसँगको भेटघाटपछि उनले यस्तो धारणा राखेका हुन्। उनले चुनावी प्रतिस्पर्धालाई स्वस्थ, शान्तिपूर्ण र मर्यादित बनाउन सबै राजनीतिक दल तथा उम्मेदवारलाई अपिल गरेका छन्।

‘अस्ति दाङ र मधेशका केही स्थानमा राजनीतिक दलका झण्डा जलाउने र निषेध गर्ने जुन कार्य भए, ती लोकतान्त्रिक मूल्य र हाम्रो सामाजिक मर्यादाविपरीत छन्,’ उनले भने, ‘हाम्रो समाज वर्षौँदेखि आपसी मेलमिलाप र सद्भावमा बाँधिएको छ। राजनीतिमा विचारको भिन्नता र प्रतिस्पर्धा स्वभाविक भए तापनि एक–अर्काका आस्था एवं राजनीतिक प्रतीकहरूप्रति अनादर प्रकट गर्नु कदापि स्वीकार्य हुन सक्दैन।’

तिमल्सिनाले लोकतन्त्र निषेध र उत्तेजनाबाट होइन, आपसी सम्मान, संयम र संवादबाट मात्र परिपक्व हुनेमा जोड दिए। निर्वाचन लोकतन्त्रको महत्वपूर्ण अभ्यास भएको स्मरण गराउँदै उनले यसलाई शान्तिपूर्ण र मर्यादित उत्सवका रूपमा सम्पन्न गर्न सबै पक्षलाई आग्रह गरेका छन्।