सिन्धुली: चियाबारी–खुर्कोट सुरुङ मार्ग निर्माण नेकपा एमालेको नेतृत्वमै सम्पन्न हुने दाबी गरिएको छ । कमलामाई नगरपालिका २ मा आयोजित चुनावी कार्यक्रममा एमाले सिन्धुली क्षेत्र नं. २ का उम्मेदवार मनोज जंग थापाले सुरुङ मार्ग आफ्नो पार्टीकै अगुवाइमा बन्ने स्पष्ट पार्दै विकास योजनामा निरन्तरता दिन मतदातालाई आग्रह गरेका छन् ।

कार्यक्रमलाई सम्बोधन गर्दै थापाले एमाले नेतृत्वको सरकारको पालामा उक्त सुरुङ मार्गका लागि बजेट विनियोजन गरिएको भए पनि पछिल्लो सरकारले बजेट कटौती गरेको खुलासा गरे । उनले सडक सञ्जाल विस्तार र यातायात सहजताले क्षेत्रीय आर्थिक गतिविधि बढ्ने भन्दै परियोजना शीघ्र सुरु गरिने बताए ।

थापाले यस क्षेत्रस्थित त्रयम्बकेश्वर ज्योतिर्लिङ्गलाई धार्मिक पर्यटनको केन्द्रका रूपमा विकास गर्ने तथा चियाबारीलाई व्यवस्थित बजार र पर्यटकीय गन्तव्य बनाउने योजना पनि प्रस्तुत गरे । पर्यटन पूर्वाधार विस्तारले रोजगारी सिर्जना र स्थानीय आयवृद्धि हुने उनको भनाइ थियो ।

माओवादी नेतृत्वको पालिकाले विकासमा विभेद गरेको आरोप लगाउँदै उनले अहिले जनस्तरमा त्यसविरुद्ध असन्तोष बढेको दाबी गरे । साथै सार्वजनिक सम्पत्ति र संरचनामा तोडफोड तथा आगजनी गर्ने गतिविधि लोकतान्त्रिक मूल्यविपरीत भएको उल्लेख गर्दै उनले मतदातालाई सचेततापूर्वक सूर्य चिन्हमा मतदान गर्न आग्रह गरे ।

कार्यक्रममा निर्मल विक्रम थापाको नेतृत्वमा एक दर्जन युवाहरू नेकपा एमालेमा प्रवेश गरेका छन् । नवप्रवेशीहरूलाई उम्मेदवार थापाले अबिर र खादा लगाएर स्वागत गरेको २ नं. प्रचार संयोजक कृष्णहरि घिमिरेले जानकारी दिए ।

सो अवसरमा एमाले नेता बिनोद खड्काले अघिल्ला निर्वाचित सांसदले चियाबारी क्षेत्रको विकासमा पर्याप्त चासो नदिएको टिप्पणी गरे । उनले आफ्नो कार्यकालमा सम्पन्न योजनाहरूको विवरण सार्वजनिक गर्दै अधुरा योजनालाई निरन्तरता दिन एमालेलाई पुनः अवसर दिनुपर्ने धारणा राखे ।

स्थानीय बासिन्दाको उल्लेख्य सहभागिता रहेको कार्यक्रममा विभिन्न विकास प्रतिबद्धता सार्वजनिक गरिँदा चुनावी माहोल थप सक्रिय बनेको सहभागीहरूले बताएका छन् ।