काठमाडौँ । काठमाडौँबाट धनगढीका लागि उडेको श्री एयरलाइन्सको जहाज अवतरण हुन नसकेपछि मध्यरातमा काठमाडौँ फिर्ता भएको छ।

उक्त जहाज राति ९ः४५ बजे काठमाडौँबाट धनगढीतर्फ उडेको थियो। धनगढी विमानस्थलमा पटक–पटक अवतरण प्रयास गरिए पनि सफल हुन नसकेपछि जहाज राति करिब १२ः०० बजे काठमाडौँ फर्किएको हो।

उडानमा चालक दलका सदस्यसहित ८० जना यात्रु सवार रहेका थिए। गन्तव्यमा अवतरण हुन नसक्दा यात्रु केहीबेर अलपत्र परेका थिए भने काठमाडौँ फर्किएपछि विमानस्थलमा केही यात्रुले असन्तुष्टि जनाएका थिए।

एयरलाइन्सका कर्मचारी सागर पौडेलका अनुसार टिकट फिर्ता गर्न चाहने यात्रुलाई रकम फिर्ता गरिनेछ। यात्रा जारी राख्न इच्छुक यात्रुलाई मंगलबार बिहानको उडानमार्फत धनगढी पठाइने व्यवस्था मिलाइएको कम्पनीले जनाएको छ।

जहाज अवतरण हुन नसक्नुको कारणबारे भने कम्पनीले आधिकारिक जानकारी दिएको छैन।