काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले तामाङ समुदायको प्रमुख पर्व सोनाम ल्होछारको अवसरमा स्वदेश तथा विदेशमा रहेका सम्पूर्ण तामाङ समुदायलाई हार्दिक शुभकामना व्यक्त गर्दै राष्ट्रिय एकता, सामाजिक सद्भाव र समावेशी विकासको पक्षमा दृढ राजनीतिक सन्देश दिएका छन्।

अध्यक्ष ओलीले जारी गरेको शुभकामना सन्देशमा सोनाम ल्होछार तामाङ समुदायको नयाँ वर्ष मात्र नभई नेपालको बहुसांस्कृतिक पहिचान, सहअस्तित्व र सामूहिक चेतनाको प्रतीक भएको उल्लेख गरेका छन्। उनले संस्कृति र पहिचानको नाममा देशलाई विभाजन गर्ने सोच र गतिविधिप्रति स्पष्ट असहमति जनाएका छन्।

शुभकामना सन्देशमा ओलीले भनेका छन्, “हिमालको काखमा जन्मिएको हाम्रो बहुसांस्कृतिक सभ्यताले नेपाललाई एकताबद्ध बनाएको छ। तामाङ समुदायको जीवनदर्शन, भाषा, भेषभूषा, नृत्य र संगीतले हाम्रो राष्ट्रिय संस्कृतिलाई समृद्ध बनाएको छ। संस्कृति र पहिचानलाई राजनीतिक स्वार्थका लागि प्रयोग गरी राष्ट्रिय एकता कमजोर पार्ने कुनै पनि प्रयास अस्वीकार्य छ।”

उनले बहुसांस्कृतिकता नै नेपालको शक्ति भएको उल्लेख गर्दै सबै समुदायको समान सम्मान, अवसर र विकास सुनिश्चित गर्नु राज्यको दायित्व भएको स्पष्ट पारेका छन्। अध्यक्ष ओलीले नेकपा एमाले समावेशी लोकतन्त्र, सामाजिक न्याय र सन्तुलित विकासको पक्षमा दृढतापूर्वक उभिएको दाबी पनि गरेका छन्।

सन्देशमा अध्यक्ष ओलीले विकास, स्थायित्व र सुशासन बिना संस्कृति संरक्षण सम्भव नहुने उल्लेख गर्दै देशलाई अस्थिरतामा धकेल्ने प्रवृत्तिको अन्त्य आवश्यक रहेको बताएका छन्। “राजनीतिक स्थायित्व, राष्ट्रिय स्वाभिमान र आर्थिक समृद्धिबिनाको बहुसांस्कृतिक सम्मान केवल नारामा सीमित हुन्छ,” सन्देशमा भनिएको छ।

सोनाम ल्होछारले तामाङ समुदायसहित सम्पूर्ण नेपाली जनतालाई एकताको सूत्रमा बाँध्दै सुख, शान्ति र समृद्धिको यात्रामा अघि बढ्न प्रेरणा देओस् भन्ने कामनासहित अध्यक्ष ओलीले नयाँ वर्षको मंगलमय शुभकामना व्यक्त गरेका छन्।