काठमाडौं । नेकपा (एमाले) का सचिव महेश बस्नेतले काठमाडौं महानगरपालिकाका मेयर बालेन साहको तीन वर्षे कार्यकाललाई असफल ठहर गर्दै प्रधानमन्त्री बन्ने दाबीलाई अपरिपक्व राजनीतिको संज्ञा दिनुभएको छ।

सामाजिक सञ्जालमार्फत सार्वजनिक धारणा व्यक्त गर्दै बस्नेतले ठूलो जनअपेक्षा र प्रतिबद्धताका साथ निर्वाचित भए पनि बालेन साहले गरेका धेरै वाचा पूरा गर्न नसकेको आरोप लगाउनुभएको छ। उहाँका अनुसार उपलब्धिभन्दा प्रचार र विवादमा बढी केन्द्रित हुँदा महानगरको समग्र कार्यसम्पादन अपेक्षाअनुसार अघि बढ्न सकेन।

बस्नेतले मेयर साहको कार्यशैली निर्माणभन्दा ध्वंसमुखी देखिएको टिप्पणी गर्दै यही पृष्ठभूमिमा प्रधानमन्त्री बन्ने दाबी गर्नु राजनीतिक हतारो र अपरिपक्वताको द्योतक भएको बताउनुभएको छ।

‘सुशासन र विकास लोकप्रियताले होइन, परिणामले मापन हुन्छ। भाइरल अभिव्यक्तिले होइन, जनताले अनुभूति गर्ने कामले नेतृत्व प्रमाणित हुन्छ,’ बस्नेतले लेख्नुभएको छ।

मेयर साहको राष्ट्रिय सत्ता दाबीले राजनीतिमा अनुभव, जिम्मेवारी र परिणाममुखी नेतृत्वको प्रश्न उठाएको उल्लेख गर्दै बस्नेतले राजनीति चर्चामा रहन होइन, देश र जनताका लागि ठोस उपलब्धि दिन सक्नुपर्ने धारणा व्यक्त गर्नुभएको छ।