काठमाडौं । नेकपा एमालेको ११ औँ महाधिवेशनमा नेतृत्वका लागि प्रतिस्पर्धामा उत्रिएका नेताहरूबीच उल्लेखनीय सौहार्दता देखिएको छ। मतदान जारी रहँदा अध्यक्षका उम्मेदवार केपी शर्मा ओली र ईश्वर पोखरेलसहितका शीर्ष नेताहरू एकसाथ हिँड्दै प्रतिनिधिहरूसँग भोट मागिरहेका छन्।

ओली र पोखरेलसँगै ओली प्यानलबाट उपाध्यक्षका उम्मेदवार विष्णु पौडेल र महासचिवका उम्मेदवार शंकर पोखरेललगायत नेताहरू पनि संयुक्त रूपमा मतदातासँग भेटघाटमा व्यस्त देखिएका छन्।

१९ जना पदाधिकारीसहित ३०१ सदस्यीय केन्द्रीय कमिटी चयनका लागि मतदान भइरहेको छ। यसअघि केही केन्द्रीय सदस्य भने निर्विरोध निर्वाचित भइसकेका छन्।

महाधिवेशनमा कुल २,२६२ जना प्रतिनिधि सहभागी छन्। प्राप्त जानकारीअनुसार दिउँसो १२ बजेसम्म करिब ४ सय मत खसिसकेको छ।

महासचिव पदका उम्मेदवार शंकर पोखरेलले निर्वाचन प्रक्रियाले एमालेको आन्तरिक लोकतन्त्र सुदृढ र सक्षम रहेको प्रमाणित गरेको प्रतिक्रिया दिएका छन्।