काठमाडौं । स्थानीय तह निर्वाचनमा देशभरका छ महानगरपालिकामध्ये चार वटामा उपमेयर जितेको नेकपा एमालेले ती चारै महानगरपालिकाका निर्वाचित उपमेयरलाई केन्द्रीय सदस्य पदको उम्मेदवार बनाएको छ ।

अध्यक्ष केपी शर्मा ओलीको प्यानलबाट उम्मेदवार बनेका चारै उपमेयरमध्ये तीन जना नयाँ अनुहार हुन् । पोखरा महानगरपालिकाकी उपमेयर मञ्जु गुरुङ भने दोस्रो पटक केन्द्रीय सदस्य पदका लागि उम्मेदवार बनेकी हुन् ।

काठमाडौं महानगरपालिकाकी उपमेयर सुनिता डंगोल, ललितपुर महानगरपालिकाकी उपमेयर मञ्जली शाक्य बज्राचार्य र विराटनगर महानगरपालिकाकी उपमेयर शिल्पा कार्की निराला पहिलो पटक केन्द्रीय सदस्यको उम्मेदवार बनेका छन् ।

सुनिता डंगोल हाल एमाले केन्द्रीय स्थानीय तह विभागकी सदस्य हुन् भने मञ्जली शाक्य बज्राचार्य ललितपुर जिल्ला कमिटीकी उपसचिव हुन् ।

विराटनगर महानगरपालिकाकी उपमेयर शिल्पा कार्की निराला भने यसअघि मोरङ जिल्ला अधिवेशनमा उपसचिव पदका लागि उम्मेदवार बनेकी थिइन्, जहाँ उनी पराजित भएकी थिइन् ।