काठमाडौं । नेकपा एमालेका स्थायी कमिटी सदस्य शेरधन राईले आगामी ११ औं महाधिवेशनमा सचिव पदमा उठ्नु आफ्नो स्वाभाविक हक भएको दाबी गर्दै स्पष्ट चेतावनी दिएका छन्।

अध्यक्ष केपी शर्मा ओलीको नेतृत्वमा लामो समयदेखि सक्रिय रहेका राईले बिहीबार काठमाडौंमा सञ्चारकर्मीहरूसँग कुरा गर्दै भने, “पार्टीमा क्रमशः अघि बढ्ने क्रममा सचिव पद मेरो स्वाभाविक दाबी हो। १० औं महाधिवेशनमा सहमतिको कारण स्थायी कमिटीमै बस्न बाध्य भएँ, अब रोक्ने कोही छैन।”

राईले आफू पार्टीका हरेक चुनौती र संकटमा अडिग नेता भएको दाबी गर्दै थपे, “म पार्टीबाट नबरालिएको मान्छे हो। आजसम्म कुनै मोडमा बाटो नबिर्सिएको छवि बनाएको छु।”

उहाँले गाउँबाट सुरु गरेको राजनीतिक यात्राले आफूलाई स्थायी कमिटीसम्म पुर्‍याएको उल्लेख गर्दै कार्यकर्ता र महाधिवेशन प्रतिनिधिले आफूलाई उपमहासचिव र सचिव दुवै पदका लागि योग्य ठानेको जानकारी दिए।

राईले स्पष्ट पारे, “यदि सहमतिले अघि बढ्यो भने सचिव पदमै मेरो उम्मेदवारी रहनेछ। स्थायी कमिटीबाट सचिव पदमा जानु स्वाभाविक प्रक्रिया हो। यो रोक्न सक्ने कोही छैन।”

उहाँले अध्यक्ष ओलीदेखि अन्य नेतासम्मले आफ्नो दाबीलाई स्वाभाविक रूपमा स्वीकार गरेको पनि बताए।