काठमाडौँ। निर्वाचन आयोगले फागुन २१ गते हुने प्रतिनिधि सभा निर्वाचनका लागि १ सय १४ राजनीतिक दललाई निर्वाचन चिन्ह प्रदान गरेको छ। निर्वाचनमा भाग लिन निवेदन दिएका १ सय २० दलमध्ये छानबिनपछि १ सय १४ दल योग्य ठहरिएका हुन्।

आयोगका अनुसार १ सय २ दल आफ्नै चिन्हमा र १२ दल संयुक्त चिन्हमा प्रतिस्पर्धा गर्नेछन्। मतपत्रमा कुल १ सय ७ वटा निर्वाचन चिन्ह समावेश हुनेछन्।

२०७९ को समानुपातिक निर्वाचनको मतका आधारमा नेकपा (एमाले) को ‘सूर्य’ पहिलो क्रमसंख्यामा, नेपाली काँग्रेसको ‘रूख’ दोस्रो र नेकपा (माओवादी केन्द्र) को ‘पाँचकुने तारा’ तेस्रो क्रममा राखिएको छ। अन्तिम अर्थात् १ सय ७ नम्बरमा जनता लोकतान्त्रिक पार्टी नेपालको ‘भैँसी’ चिन्ह रहेको छ। आयोगले जनाएको छ कि २ दलको निवेदन खारेज गरिएको छ भने १ दलले निवेदन फिर्ता लिएको छ।