काठमाडौं । नेपाल कम्युनिस्ट पार्टी (एमाले) ले आगामी मंसिरमा हुन लागेको ११ औँ राष्ट्रिय महाधिवेशनको स्थल पोखराबाट काठमाडौं सार्ने निर्णय गरेको छ। शनिबार काठमाडौंको गुण्डुमा बसेको एमाले सचिवालय बैठकले महाधिवेशन स्थल परिवर्तन गर्ने निर्णय गरेको हो।

बैठकपछि पत्रकारहरूसँग कुरा गर्दै पार्टीका उपमहासचिव प्रदीप ज्ञवालीले भने,

“नेकपा (एमाले) को सचिवालय बैठकले मुख्यतया तीन वटा महत्वपूर्ण निर्णयहरू गरेको छ। पहिलो, पार्टीको ११ औँ राष्ट्रिय महाधिवेशन आगामी मंसिर २७ देखि २९ गतेसम्म गर्ने निर्णयलाई पुनः पुष्टि गरिएको छ। सो निर्णयलाई थप स्पष्टता दिँदै बैठकले महाधिवेशन स्थल पोखराको सट्टा काठमाडौंमा आयोजना गर्ने निर्णय गरेको हो।”

पहिले एमालेले महाधिवेशन पोखरामा गर्ने निर्णय गरेको थियो। तर, व्यवस्थापकीय कारण तथा सहभागी संख्या बढी हुने अनुमानका कारण स्थल परिवर्तन गरिएको बताइएको छ। उपमहासचिव ज्ञवालीका अनुसार देशभरका ६ लाख ६७ हजार ६३० पार्टी सदस्यबाट विभिन्न अनुपातमा प्रतिनिधि चयन गरिनेछ।
उनका अनुसार प्रतिनिधि चयन मंसिर १३ गते शनिबार देशभर एकै दिन हुने र त्यसको विवरण मंसिर १५ गते साँझसम्म केन्द्रीय कार्यालयमा पठाइसक्नुपर्ने छ। एमालेको ११ औँ महाधिवेशन पार्टीको नेतृत्व, नीतिगत दिशा र आगामी राजनीतिक रणनीतिलाई पुनःनिर्धारण गर्ने महत्वपूर्ण अवसरका रूपमा हेरिएको छ ।