काठमाडौं । नेकपा (एमाले) अब आगामी मङ्सिर २७ देखि २९ गते पोखरामा हुने ११औं महाधिवेशनको तयारीमा पूर्ण रूपमा जुटेको छ। पार्टीले महाधिवेशनलाई संगठन सुदृढीकरण, नीतिगत स्पष्टता र नयाँ नेतृत्वगत ऊर्जाको महोत्सवका रूपमा हेरेको छ।

पार्टीले कात्तिक १५ गते सचिवालय बैठक बोलाएको छ, जसमा महाधिवेशन तयारी, प्रतिनिधि चयनको मोडालिटी र व्यवस्थापनका एजेन्डा प्रमुख रहनेछन्। पार्टी केन्द्रीय कार्यालयका अनुसार यसपटक महाधिवेशनलाई झनै व्यवस्थित, अनुशासित र उद्देश्यपूर्ण बनाउने तयारी गरिएको छ।

गत चितवनको सौराहामा सम्पन्न १०औं महाधिवेशनमा १८ सय प्रतिनिधि सहभागी भएका थिए। तर, यसपटक एमालेले प्रतिनिधि संख्या घटाएर करिब १२ सयमा सीमित गर्ने तयारी गरेको छ -ताकि छलफल बढी परिणाममुखी र व्यवस्थापन सरल होस्।

महासचिव शङ्कर पोखरेल, उपमहासचिव प्रदीप ज्ञवाली, स्थायी समिति सदस्य विष्णु रिमाल, संगठन विभाग प्रमुख काशीनाथ अधिकारी र डा. भीष्म अधिकारीलगायत नेताहरू महाधिवेशन तयारीमा निरन्तर गृहकार्यमा छन्।

पार्टीले यसपटक प्रतिनिधि चयनमा सहमतिको विधि अवलम्बन गर्ने सम्भावना बलियो बनेको छ। मुलुकको राजनीतिक जटिलता र राष्ट्रिय जिम्मेवारीलाई मध्यनजर गर्दै पार्टीभित्र एकता र अनुशासनलाई प्राथमिकतामा राखिएको छ।

एक वरिष्ठ एमाले नेताका शब्दमा, “यो महाधिवेशन केवल नेतृत्व चयनको औपचारिकता होइन, यो हाम्रो राजनीतिक दर्शन, संगठनात्मक एकता र राष्ट्रिय संकल्पको अभिव्यक्ति हो।”

एमालेका कार्यकर्ताहरूले देशभर महाधिवेशन तयारीलाई उत्सवका रूपमा लिएका छन्। संगठनका सबै तहमा ऊर्जा, उत्साह र एकताको लहर फैलिएको छ — जसले देखाउँछ, एमाले पुनः राष्ट्रिय राजनीतिक नेतृत्वको केन्द्रमा फर्किन दृढ छ।