काठमाडौं । निर्वाचन आयोगले आज राजनीतिक दलहरूसँग आगामी प्रतिनिधि सभा निर्वाचनबारे छलफल गर्दैछ।

प्रतिनिधि सभा विघटन भएपश्चात् फागुन २१ गते प्रतिनिधि सभा निर्वाचन हुने मिति तय गरिएको छ। यस सम्बन्धमा आयोगले आज बिहान साढे ११ बजे राजनीतिक दलहरूसँग छलफल गर्ने तयारी गरेको छ।

निर्वाचन आयोगका सहसचिव तथा प्रवक्ता नारायणप्रसाद भट्टराईका अनुसार, छलफलमा विघटित प्रतिनिधि सभा, प्रदेश सभा र स्थानीय तहमा प्रतिनिधित्व गर्ने कुल २८ दललाई सहभागी हुन निमन्त्रणा गरिएको छ।

छलफलको मुख्य उद्देश्य आगामी निर्वाचन सञ्चालनका प्रक्रिया, समय तालिका र दलहरूको सुझाव तथा सरोकार सुनुवाइ गर्नु रहेको छ। आयोगले यसबाट निर्वाचन सुचारु, पारदर्शी र निष्पक्ष रुपमा सम्पन्न गर्न आवश्यक तयारी गर्न सक्ने विश्वास व्यक्त गरेको छ।