काठमाडौं । विश्वभर आज (बिहीबार) ४५ औँ विश्व खाद्य दिवस मनाइँदैछ।
नेपालमा पनि सरकारले स्वच्छ, पोषणयुक्त र सन्तुलित भोजनको महत्त्वबारे जनचेतना फैलाउन विभिन्न कार्यक्रम आयोजना गर्दै यो दिवस मनाइरहेको छ।

कृषि विभागको आयोजना र संयुक्त राष्ट्रसंघको खाद्य तथा कृषि संगठन (एफएओ), खाद्यका लागि कृषि अभियानलगायत विभिन्न सङ्घ–संस्थाको सहकार्यमा दिवस मनाइँदैछ। यसवर्षको नाराः ‘स्वच्छ खाना र सुखद भविष्यका लागि हातेमालो’ राखिएको छ। सरकारका अनुसार यो नारा नेपालको खाद्य सुरक्षासँग जोडिएको दीर्घकालीन उद्देश्यसँग मेल खानेछ। स्मरणीय छ, सन् १९७९ नोभेम्बरमा संयुक्त राष्ट्रसंघको २०औँ साधारणसभाले एफएओको स्थापना दिवसको अवसरमा हरेक वर्ष अक्टोबर १६ लाई विश्व खाद्य दिवसका रूपमा मनाउने निर्णय गरेको थियो। त्यसयता, सन् १९८१ देखि विश्वभर यो दिवस मनाइँदै आएको हो।

नेपालमा यस अवसरमा विभिन्न विद्यालय, स्थानीय तह र कृषि व्यवसायमा संलग्न संस्थाहरूले स्वच्छ खानाको प्रवर्द्धन, फोहर व्यवस्थापन, र स्थानीय उत्पादन उपभोग सम्बन्धी सचेतना कार्यक्रम सञ्चालन गर्ने तयारी गरेका छन्।