काठमाडौं । हाल देशभर कुनै उल्लेखनीय मौसमी प्रणाली सक्रिय नरहेकाले अधिकांश स्थानमा मौसम सफा रहने मौसम पूर्वानुमान महाशाखाले जनाएको छ।

मंगलबार दिउँसो कोशी, गण्डकी र सुदूरपश्चिम प्रदेशका पहाडी भू–भागहरूमा आंशिक बदली रहनेछ भने बाँकी भू–भागहरूमा मौसम मुख्यतया सफा रहने महाशाखाको भनाइ छ। कोशी प्रदेशका पहाडी क्षेत्रका एक–दुई स्थानहरूमा हल्का वर्षा हुन सक्ने सम्भावना रहेको जनाइएको छ। त्यसबाहेक अन्य प्रदेशहरूमा उल्लेखनीय मौसमी गतिविधि देखिने अनुमान छैन।

आज राति देशभर मौसम सामान्यतः सफा रहने पूर्वानुमान गरिएको छ। मौसम विज्ञहरूका अनुसार हाल नेपालमा पश्चिमी वायु प्रणालीको प्रभाव कमजोर रहेकोले विशेष किसिमको मौसमी उतार–चढाव देखिएको छैन। तथापि, पहाडी भू–भागमा स्थानीय प्रभावका कारण आंशिक बदली र छिटपुट वर्षा देखिनु सामान्य भएको उनीहरू बताउँछन्।

यात्रा वा बाहिरी गतिविधिमा संलग्न नागरिकहरूलाई मौसमको सामान्य अवस्थाबारे जानकारीमा रहन महाशाखाले आग्रह गरेको छ।