काठमाडौं । नेकपा एमालेले मङ्सिर अन्तिम साता पार्टीको महाधिवेशन गर्ने निर्णय गरेको छ। साथै पार्टीले संसद् पुनःस्थापना र हालको प्रतिगमनविरुद्ध एकजुट हुने रणनीति अघि सारेको छ।

पार्टीका उपमहासचिव प्रदीपकुमार ज्ञवालीका अनुसार तीन दिनदेखि जारी पदाधिकारी बैठकले यी विषयलाई २९, ३० र ३१ गते बस्ने केन्द्रीय कमिटी बैठकमा लैजाने निर्णय गरेको छ। नेता ज्ञवालीले सरकार असंवैधानिक तरिकाले बनेको र चुनावको वातावरण नभएको बताए। ‘सरकार चुनाव गराउने तयारीमा छैन। दलहरूलाई धम्काएर निर्वाचन कसरी हुन्छ? चुनावको आत्मा मरिरहेको छ,’ उनले भने।

ज्ञवालीले भने, संसद् पुनःस्थापनाले अहिलेको राजनीतिक समस्याको निकास दिनेछ। पार्टी अध्यक्ष केपी ओलीको राजीनामा मागबारे बाहिर आएका बहस अनावश्यक रहेको उनको भनाइ थियो । एमालेको महाधिवेशन मङ्सिर अन्तिम साता हुने तय भएको छ भने मिति र स्थान केन्द्रीय कमिटी बैठकले निर्धारण गर्नेछ।