काठमाडौं । भौतिक पूर्वाधार तथा यातायात मन्त्री कुलमान घिसिङले बाढी–पहिरोले क्षति पुगेको बीपी राजमार्गको निरीक्षण गरेका छन्।

अनुगमनमा मन्त्रालयका सचिव केशव शर्मा र सडक विभागका महानिर्देशक विजय जैसीसहितको प्राविधिक टोली सहभागी भएको थियो। मन्त्री घिसिङले विशेष गरी रोशीको बाढीले प्रभावित चौकीडाँडा क्षेत्रको स्थलगत निरीक्षण गरेका छन्। त्यहाँ करिब ४ किलोमिटर सडकमा अस्थायी डाइभर्सन निर्माण गरेर सञ्चालनमा ल्याउने तयारी भइरहेको छ। उनले सडक विभाग र निर्माण व्यवसायीहरूलाई निर्देशन दिएका छन् कि, संघीय राजधानी काठमाडौंसँग बागमती, मधेश र कोशी प्रदेशका जिल्लाहरूलाई जोड्ने यो महत्वपूर्ण लाइफलाइन सडक जतिसक्दो छिटो सञ्चालनमा ल्याउन आवश्यक छ।

गत वर्षको बाढीले भकुण्डे–नेपालथोक खण्डलाई क्षति पुर्‍याएको थियो। उक्त सडक खण्डमा अस्थायी डाइभर्सन निर्माण गरी सञ्चालन गरिएकोमा यस वर्षको बाढीले करिब ४ किलोमिटर सडक पूर्णरूपमा बगाएको छ। मन्त्रालयका अनुसार, क्षतिग्रस्त सडकको केही खण्डको स्थायी निर्माणको ठेक्का लागिसकेको छ भने केही खण्डको ठेक्का सम्झौताको अन्तिम चरणमा रहेको छ।