काठमाडौं । देशभर मनसुनी वायुको प्रभाव कमजोर भएको जल तथा मौसम विज्ञान विभाग, मौसम पूर्वानुमान महाशाखाले जनाएको छ। मंगलबार स्थानीय वायुको आंशिक प्रभाव मात्र रहने भएकाले वर्षाको सम्भावना सीमित क्षेत्रमा रहनेछ ।

महाशाखाका अनुसार दिउँसो कोशी प्रदेशसहित देशका पहाडी भू-भागमा सामान्यतया बदली रहनेछ भने बाँकी स्थानमा आंशिक बदली हुनेछ। कोशी, मधेश, बागमती र गण्डकी प्रदेशका पहाडी भू-भागका केही स्थान तथा तराईका एक–दुई स्थानमा मध्यम वर्षा हुने अनुमान गरिएको छ। कोशी र बागमती प्रदेशका पहाडी भू-भागका एक-दुई स्थानमा भने भारी वर्षा पर्न सक्ने सम्भावना छ।

मंगलबार राति पनि देशका पहाडी भू-भागमा साधारणतया बदली रहने र तराईका केही स्थानमा मध्यम वर्षा पर्न सक्ने विभागले जनाएको छ। विभागले वर्षा हुने सम्भावना रहेका क्षेत्रका बासिन्दालाई आवश्यक सतर्कता अपनाउन आग्रह गरेको छ।