भक्तपुर । ऊर्जा, जलस्रोत तथा सिंचाइ, भौतिक पूर्वाधार तथा यातायात तथा सहरी विकास मन्त्री कुलमान घिसिङले सूर्यविनायक–धुलिखेल सडक विस्तार परियोजनाको स्थलगत अनुगमन गर्दै आवश्यक बजेट सुनिश्चित गर्ने प्रतिवद्धता व्यक्त गरेका छन् ।

अनुगमनका क्रममा उनले मन्त्रालयका अधिकारी, सडक विभागका महानिर्देशक, आयोजना प्रमुख तथा निर्माण व्यवसायीसँग छलफल गर्दै खाल्डाखुल्डी तत्काल मर्मत गरी यातायात सहज बनाउन निर्देशन दिए । साथै, जनशक्ति र उपकरण थप गरी यसै आर्थिक वर्षभित्र सडक विस्तार सम्पन्न गर्नुपर्नेमा उनले जोड दिए ।

१५.८ किलोमिटर लामो सडकलाई ६ लेनमा विस्तार गर्ने कार्य अन्तर्गत सूर्यविनायक-साँगा खण्डमा ३९ प्रतिशत र साँगा–धुलिखेल खण्डमा ५१ प्रतिशत काम सकिएको छ । समग्रमा ४५ प्रतिशत प्रगति हुँदा ८० प्रतिशत टेवा पर्खाल र नाली निर्माण सम्पन्न भएको छ भने करिब १ किलोमिटरमा कालोपत्रे भएको छ ।

तर, सडक सीमा विवाद, घर-टहरा हटाउने समस्या र बजेटको कमीले काम प्रभावित भएको छ । विभागका महानिर्देशक विजय जैशीका अनुसार यस वर्ष करिब ३ अर्ब बजेट आवश्यक परे पनि हालसम्म ५० करोड मात्र विनियोजन भएको छ । मन्त्री घिसिङले भने, “बजेटको अभाव हुन दिन्नँ, परियोजना समयमा पूरा हुन्छ ।”