काठमाडौं । अमेरिकाको पेन्सिलभेनिया राज्यमा बुधबार भएको एक भीषण गोलीकाण्डमा तीन जना प्रहरी अधिकारीको ज्यान गएको छ भने दुई जना गम्भीर घाइते भएका छन्।

स्थानीय समयअनुसार दिउँसो २ बजे योर्क काउन्टीस्थित उत्तरी कोडोरस टाउनशिपको एक विद्यालय नजिकै गोली चल्ने घटना भएको अमेरिकी तथा अन्तर्राष्ट्रिय सञ्चारमाध्यमहरूले जनाएका छन्। BBC को रिपोर्टअनुसार, गोली चलाउने व्यक्ति प्रहरीको जबाफी कारबाहीमा मारिएको छ। घटनाबारे विस्तृत जानकारी हालसम्म सार्वजनिक गरिएको छैन भने स्थानीय प्रशासनले अनुसन्धान सुरु गरिसकेको छ।

पेन्सिलभेनिया प्रहरी कमिश्नर क्रिस्टोफर पेरिसले घटनापछि पत्रकारहरूसँग कुरा गर्दै दुई जना प्रहरी गम्भीर घाइते भएको र तिनलाई हेलिकप्टरमार्फत उद्धार गरी अस्पताल भर्ना गरिएको जानकारी दिएका छन्। गोलीकाण्डपछि पेन्सिलभेनिया राज्य सरकारले सबै सरकारी कार्यालयमा झन्डा आधा झुकाउने निर्णय गरेको छ। राज्यका गभर्नरले घटनाप्रति गहिरो दुःख व्यक्त गर्दै मृतकप्रति श्रद्धाञ्जली अर्पण गरेका छन्।

अत्यधिक बन्दुक हिंसाले सताएको अमेरिकामा यो अर्को दुःखद घटना भएको भन्दै सामाजिक सञ्जालमा सर्वसाधारणले आक्रोश व्यक्त गरेका छन्। प्रहरीले गोलीकाण्डको कारण, दोषीको पहिचान, र घटना स्थलमा थप जोखिम रहे–नरहेको विषयमा विस्तृत अनुसन्धान थालेको जनाएको छ। प्रारम्भिक जानकारीअनुसार, गोलीकाण्ड विद्यालय नजिकै भए पनि विद्यार्थीहरू सुरक्षित रहेको जनाइएको छ।

स्थानीय बासिन्दाहरूले तीव्र गोली आवाज सुनिएको, त्यसपछि अहिलेसम्म कहिल्यै नदेखिएको संख्यामा प्रहरी र आपतकालीन टोलीहरू पुगेको बताएका छन्।