काठमाडौं । प्रधानमन्त्री सुशीला कार्की नेतृत्वको अन्तरिम सरकारले मन्त्रिपरिषद्‌ विस्तारको अन्तिम तयारी गरिरहेको छ। शनिबार दिनभरि आफ्ना निकट सल्लाहकार र राजनीतिक सरोकारवालाहरूसँग छलफलमा व्यस्त रहेकी प्रधानमन्त्री कार्कीले आइतबार (भोलि) मन्त्रिपरिषद्‌ विस्तार गर्ने तयारी गरेकी छिन्।

सरकारी स्रोतका अनुसार, आजैसम्म मन्त्रालयहरूको बाँडफाँट र मन्त्रीहरूको नामावली टुंग्याउने प्रयास भइरहेको छ। मन्त्रालयहरूको जिम्मेवारी मिलाउन प्रधानमन्त्री कार्यालयमा उच्च तहको आन्तरिक छलफल जारी छ।

प्रधानमन्त्री कार्कीलाई विभिन्न दल र नागरिक समाजका तर्फबाट समेत दबाब रहेको बताइएको छ, जसले अन्तरिम सरकारमा निष्पक्षता, समावेशिता र योग्यतालाई प्राथमिकता दिनुपर्ने जोड दिएका छन्।

पूर्वप्रधानन्यायाधीशको रुपमा देशको सर्वोच्च न्यायिक पदमा रहेकी सुशीला कार्की शुक्रबार अन्तरिम सरकारको प्रधानमन्त्री नियुक्त भएकी हुन्। उनको नेतृत्वमा गठन हुने मन्त्रिपरिषद्ले आगामी संघीय निर्वाचनसम्म शासन सञ्चालन गर्नेछ।

प्रधानमन्त्री कार्कीले सरकारको प्राथमिकता संवैधानिक प्रक्रिया कार्यान्वयन, निर्वाचनको तयारी, र प्रशासनिक शुद्धता कायम राख्नु रहेको स्पष्ट पारिसकेकी छन्। मन्त्रिपरिषद् विस्तारमा राजनीतिक दलहरूबीचको समझदारी र शक्ति सन्तुलन कायम राख्ने गरी टुंगो लगाउने तयारी भइरहेको बताइएको छ।

अन्तरिम सरकारको प्रभावकारिता र निष्पक्षता निर्धारण गर्ने मुख्य आधार नै यही मन्त्रिपरिषद् बन्ने भएकाले आम नागरिक र विश्लेषकहरूको नजर पनि भोलिको विस्तारमा केन्द्रित भएको छ।