काठमाडौं । नेकपा (एमाले)को दोस्रो विधान महाधिवेशनको पूर्वसन्ध्यामा पार्टी केन्द्रीय सचिवालय बैठक बस्न लागेको छ। भदौ १९ गते बिहीबार बोलाइएको सचिवालय बैठकमा पार्टीको राजनीतिक दिशा, संगठन सुदृढीकरण र विधान संशोधनसम्बन्धी प्रमुख प्रस्तावहरूमा निर्णायक छलफल हुने भएको छ ।

एमाले प्रचार विभाग प्रमुख राजेन्द्र गौतमका अनुसार, बैठकमा तीन महत्वपूर्ण प्रतिवेदन-राजनीतिक प्रतिवेदन, विधान संशोधन प्रतिवेदन र सांगठनिक प्रतिवेदन प्रस्तुत गरिनेछ। ती सबै प्रतिवेदन छलफलपछि पारित गरेर विधान महाधिवेशनमा पेस गरिनेछन् ।

महाधिवेशनमा व्यापक सहभागिता

एमालेको दोस्रो विधान महाधिवेशन यही भदौ २० गतेदेखि २२ गतेसम्म ललितपुरको गोदावरीस्थित सन्राइज सम्मेलन केन्द्रमा हुने तय भएको छ। महाधिवेशनमा २,०३३ जना प्रतिनिधि र ३१७ जना पर्यवेक्षकसहित २,३५० जनाको सहभागिता रहनेछ।