काठमाडौं । नेपाल शिक्षक महासंघले विद्यालय शिक्षा विधेयकमा संशोधनको माग गर्दै नेकपा (एमाले) को पार्टी कार्यालय च्यासलमा धर्ना दिएको छ । बिहीबार बिहान ११ बजेदेखि सुरु भएको उक्त धर्नामा महासंघका सयौं शिक्षकहरू सहभागी भएका थिए ।

महासंघले प्रतिनिधिसभामा पेश भएको विद्यालय शिक्षा विधेयक शिक्षक हितविपरीत रहेको भन्दै प्रमुख राजनीतिक दलहरूलाई चरणबद्ध दबाब दिइरहेको छ । यसअघि बुधबार महासंघले नेपाली कांग्रेसको केन्द्रीय कार्यालय सानेपामा धर्ना दिएको थियो । महासंघले शुक्रबार माओवादी केन्द्रको केन्द्रीय कार्यालय पेरिसडाँडामा धर्ना दिने कार्यक्रम समेत सार्वजनिक गरेको छ ।

महासंघका अध्यक्ष लक्ष्मीकिशोर सुवेदीका अनुसार संसदमा विचाराधीन विधेयक विगतमा भएका सहमति र छलफललाई बेवास्ता गर्दै ल्याइएको छ । “शिक्षकका हकहित, स्थायीत्व, बढुवा, सेवा सुविधा लगायतका विषय समेटिएको छैन,” उनले भने, “हामी विधेयकको यथास्थितिमा विरोध गर्दछौं र तत्काल संशोधनको माग गर्दछौं ।” महासंघले अस्थायी शिक्षकलाई स्थायी नियुक्ति दिने प्रक्रियामा ७५ प्रतिशत आन्तरिक प्रतिस्पर्धा र २५ प्रतिशत खुला प्रतियोगिता हुनुपर्ने माग गर्दै आएको छ । तर प्रस्तावित विधेयकमा ६० प्रतिशत आन्तरिक र ४० प्रतिशत खुला प्रतिस्पर्धा व्यवस्था गरिएको छ ।

यस्तै, स्थायी शिक्षकको आवधिक बढुवा, अस्थायी अवधिको अनुभव गणना, अध्यापन अनुमति पत्रको म्याद थप, विभागीय कारबाही प्रक्रिया लगायतका विषयमा स्पष्ट व्यवस्था नभएको भन्दै महासंघले आपत्ति जनाएको छ।

विद्यालय कर्मचारी र बालकक्षा शिक्षकको पद तथा सेवा सुविधाको सुनिश्चितता नहुनु, निजी विद्यालयका शिक्षकहरूका लागि अव्यवहारिक सरुवा नीति ल्याइनु, शिक्षक दरबन्दी स्थानीय तहमा हस्तान्तरण गर्ने व्यवस्था लगायतका विषयमा समेत महासंघ असन्तुष्ट देखिएको छ ।

शिक्षण काउन्सिल गठन र राष्ट्रिय परीक्षा बोर्डमा महासंघको प्रतिनिधित्व नसमावेश गरिनुले समेत शिक्षक समुदायको आवाज बेवास्ता गरिएको संकेत गर्छ, महासंघले जनाएको छ

महासंघले सरकारसँग संवादमार्फत समाधान खोज्ने प्रयास जारी रहेको र माग सम्बोधन नभए थप कडा आन्दोलनका कार्यक्रम घोषणा गर्ने चेतावनी समेत दिएको छ ।