काठमाडौँ । उपप्रधान तथा सहरी विकास मन्त्री प्रकाशमान सिंहले प्राथमिकतामा परेका योजनाहरूलाई प्रविधिको माध्यमबाट प्रभावकारी र छिटो ढंगले कार्यान्वयन गर्न सकिने बताएका छन् ।

बिहीबार मन्त्रालयमा आयोजित कार्यक्रममा प्राथमिकता प्राप्त आयोजनाहरूको अनलाइन अनुगमन कक्षको अनुगमन गर्दै मन्त्री सिंहले प्रविधिको सदुपयोगबाट योजना कार्यान्वयनमा समय, स्रोत र समन्वयमा सहजता आउने बताए ।

“प्रविधिलाई सदुपयोग गरेर प्रभावकारी तवरले काम गर्नका लागि आवश्यक टुल्सहरू प्रयोग गर्न जान्नुपर्छ,” मन्त्री सिंहले बताए, “आजको युग प्रविधिको हो, हामीले यसलाई आत्मसात् गर्नुपर्छ ।” उनका अनुसार अनलाइन अनुगमन कक्षमार्फत फिल्डमा काम गरिरहेका कर्मचारी र मन्त्रालयबीच प्रत्यक्ष समन्वय सम्भव हुने भएकाले योजनाको अनुगमन र समस्या समाधान प्रक्रियामा पारदर्शिता र छिटो निर्णयसमेत गर्न सकिनेछ ।

मन्त्री सिंहले मन्त्रालयबाट प्राथमिकतामा परेका आयोजना तथा योजनाहरूको अनुगमन, गुनासोहरूको समाधान, र समयमै समापन सुनिश्चित गर्न यो प्रविधि सहायक हुने विश्वास व्यक्त गरे ।