सिन्धुलीका नेवार समुदायले यस वर्षको श्रीकृष्ण जन्माष्टमीका दिन परम्परागत शैलीमा भव्य लाखे नाच प्रदर्शन गरेर मनाएका छन् । कृष्ण जन्माष्टमीलाई भब्य रुपमा मनाउन भीमशेन मन्दिर संरक्षण समिति, नेवा गुठी समाज र नेवाः देय् दबुको संयुक्त आयोजनामा आजको कार्यक्रमको आयोजना गरिएको नेवाः देय् दबुकी सचिव रेजिना श्रेष्ठले जानकारी दिइन् । आजको कार्यक्रम विभिन्न धार्मिक र सांस्कृतिक झाँकीसहित सम्पन्न गरिएको हो ।
कार्यक्रममा जातीय भेषभूषासहितको लाखे नाच गणेशस्था तथा भीमशेन मन्दिर परिसरबाट सुरु भई परिक्रमा सिन्धुलीमाढीको २ नं बजार, गैरीबजार, १ नं बजार, स्टल बजार र मधुटार हुँदै ढुंग्रेवास पुगेर समापन गरिएको थियो ।
श्रेष्ठका अनुसार, तलेजु भगवान् सँग सम्बन्धित रहेको लाखे नाचलाई राक्षस र मानवसँगको प्रेमको प्रतिकका रूपमा पनि लिने गरिएको छ । ज्यापुको छोरी सँग भुतको गहिरो माँया प्रीति बस्दा भुत र मान्छे सँगको भावनात्मक सम्बन्ध जोड्ने उदेश्यले लाखे नाच थालिएको हो । यो तान्त्रिक विधि–विधानमा आधारित सांस्कृतिक अनुष्ठान भएकाले निश्चित विधि अनुसार गरिने चलन रहेपनि सिन्धुलीमा अलि भिन्न प्रकृतिबाट मनाउने चलन रहेको उनको भनाई छ ।

सचिव श्रेष्ठले ढुंग्रेवासमा रहेको कृष्ण मन्दिरमा लाखे अर्थात भूतलाई भगवान श्रीकृष्णले बध गरेपछि कार्यक्रमको समापन भएको जानकारी दिइन् ।

सिन्धुलीका नेवारी समुदायले कृष्ण जन्माष्टमीलाई यस वर्ष पनि उल्लासपूर्ण वातावरणमा मनाउन सहयोग गर्ने सम्पूर्णलाई अध्यक्ष राजकुमार श्रेष्ठले धन्यवाद ज्ञापन गरेका छन् । उनले सन्देश जनप्रियसँगको कुराकानीका क्रममा विगत वर्षभन्दा यस वर्ष कार्यक्रम अझ उत्साहपूर्ण भएको प्रतिक्रिया दिए ।
कार्यक्रममा वागमती प्रदेशका पूर्व मन्त्री एवम् सांसद गंगानारायण श्रेष्ठ, सिन्धुली उद्योग बाणिंज्य संघका पदाधिकारी, विभिन्न राजनैतिक दलका नेताहरुको सहभागिता रहेको थियो ।- दिपा भण्डारीबाट