सर्लाही । सर्लाहीमा एक जना शिक्षकलाई गोली हानी हत्या गरिएको छ । जिल्लाको हरिवन नगरपालिका–७ निवासी ५५ वर्षीय शिक्षक रामपुकार यादवको शनिबार राति घर अगाडि गोली प्रहारबाट मृत्यु भएको हो ।

प्रहरीका अनुसार राति करिब साढे ८ बजे मोटरसाइकलमा आएका हतियारधारीले यादवको टाउकोमा गोली प्रहार गरी फरार भएका थिए । गम्भीर घाइते भएका यादवलाई उपचारका लागि महोत्तरीको रामगोपालपुरस्थित जानकी एकेडेमिक अस्पताल ल्याउँदै गर्दा बाटैमा उनको मृत्यु भएको थियो ।

गोली प्रहारमा संलग्न एक व्यक्तिलाई प्रहरीले पक्राउ गरेको छ । भाग्ने क्रममा मोटरसाइकल दुर्घटनामा परेका ती व्यक्ति गम्भीर घाइते भएका र उनलाई प्रारम्भिक उपचारपछि प्रादेशिक अस्पताल जनकपुर पठाइएको जिल्ला प्रहरी कार्यालय सर्लाहीका प्रवक्ता डीएसपी सरोज राईले जानकारी दिएका छन् ।