काठमाडौं । शिक्षा, विज्ञान तथा प्रविधिमन्त्री रघुजी पन्तले काठमाडौँमा बसोबास गर्ने ८० प्रतिशत युवाहरूले जागिर नखाईकनै घरबाटै मासिक दुई लाख रुपैयाँभन्दा बढी कमाउने दाबी गरेका छन् ।

शनिबार नेपाल कम्युनिष्ट पार्टी (एमाले) काठमाडौं महानगरपालिका–१५ वडा कमिटीद्वारा आयोजित एसईई पास विद्यार्थीहरूलाई सम्मान तथा शुभकामना कार्यक्रमलाई सम्बोधन गर्दै मन्त्री पन्तले भने, “अहिलेका युवाहरूले विदेशका विभिन्न कम्पनीहरूबाट अनलाइन माध्यमबाट काम लिएर ल्याप्टपबाट घरमै बसेर काम गरिरहेका छन्। यसबाट देशले वार्षिक एक खर्ब रुपैयाँभन्दा बढी आम्दानी गरिरहेको छ ।”

उनले यस्ता अनलाइन तथा डिजिटल माध्यमका रोजगारीलाई प्रवर्द्धन गर्न सके यो आम्दानी आठ खर्ब रुपैयाँसम्म पुर्याउन सकिने विश्वास व्यक्त गरे । मन्त्री पन्तले परम्परागत पेशा व्यवसायजस्तै डाक्टर वा इन्जिनियर बन्ने सोचमा मात्र सीमित नभई नयाँ प्रविधियुक्त क्षेत्रमा युवाहरूले करियर बनाउनुपर्नेमा जोड दिए। उनले भने, “डाक्टर वा इन्जिनियर बन्नु नै सफलता होइन, समयअनुसार रोजगारीका नयाँ ढोका खुलेका छन्। त्यसलाई सदुपयोग गर्न सके युवाले घरमै बसेर राम्रो कमाई गर्न सक्छन्।”

त्यस्तै, उनले अभिभावकहरूलाई पनि सन्तानको इच्छा र क्षमता अनुसार मार्गनिर्देशन दिन आग्रह गरे। “छोरा छोरी के बन्न चाहन्छन् भन्ने कुरा बुझेर त्यसैमा सहयोग गर्नुपर्छ। अभिभावकले आफ्नो इच्छाअनुसार जबरजस्ती लाद्न मिल्दैन,” उनले स्पष्ट पारे।

उनको अभिव्यक्तिले डिजिटल प्रविधिको युगमा स्वतन्त्र पेशा (freelancing), सूचना प्रविधि, डिजाइन, कन्टेन्ट क्रिएसन, ब्लगिङ, अनलाइन मार्केटिङ, रेमोट वर्क लगायतका क्षेत्रमा सम्भावना बढ्दो रहेको तथ्यलाई औंल्याएको छ।