सिन्धुली: नेकपा एमालेका सिन्धुलीका नेता एवम् कमलामाई नगरपालिका सिन्धुलीका निवर्तमान नगरप्रमुख खड्गवहादुर खत्रीले सामाजिक सञ्जाल मार्फत कमलामाई नगरपालिका वडा नम्बर १२ का स्थानीयले उठाएका मागहरु सम्वोधन गर्नुको साटो जनप्रतिनिधीले बिवाद बढाएको बताउनु भएको छ । सामाजिक सञ्जाल फेसबुकमा खानेपानीको समस्या समाधानमा नगरप्रमुखले भूमिका निर्वाह गर्नुको साटो अझ चर्काएको आरोप लगाउँदै बुधवार मध्यान्ह स्थानीयले रित्तो गाग्री लिएर प्रदर्शन गरेपछि आफ्नो कुरालेख्दै खत्रीले तत्कालै समस्याको सामाधान नखोजे ठूलै दुर्घटना हुने बताउनु भएको हो ।

नेता खत्रीले लेख्नु भएको स्टाटस जस्ताको तस्तैः

कमलामाई नगरपालिकामा जे देखियो :

नेपाल सरकार एक घर, एक धारा नीतिको कुरा गर्छ, तर देशको भौगोलिक अवस्था र विकास बजेटको वास्तविकता नहेरी सस्तो लोकप्रियता मात्र खोज्छ। जनताको राय बिना सडक र राजमार्ग बनाइन्छन्; जसले गर्दा निर्माण कार्य थालनी हुन नपाई ती अवरुद्ध हुने समस्या दोहोरिरहन्छ।

जहाँसम्म कनपा-१२ का जनताले पिउने पानी पाउनुपर्छ भन्ने माग राखेका छन् । त्यो स्वाभाविक छ, तर कनपा-११ का बासिन्दाले हाम्रो शिर काटेर लैजान दिँदैनौँ भन्ने चेतावनी दिने स्थिति आउनु दुःखद् हो। १२ नम्बर वडाका जनतालाई पानी उपलब्ध गराउन नेवा संस्थाले पाइप जडान गरिसकेको थियो, तर काम सुरु भएपछि विवाद उत्पन्न भयो।

यो विवादको समाधान गर्ने जिम्मा कमलामाई नगरपालिकाको हो। तर समाधान गर्नुको सट्टा जनप्रतिनिधिहरूले झन् विवाद बढाएको गुनासो स्थानीय जनताले गरिरहेका छन्। यस्तो अवस्थामा बेलैमा दुवै पक्षलाई राखेर सहमति जुटाउनु जरुरी छ। जनताले चुनेका प्रतिनिधिहरूले समस्याको समाधान खोज्नुपर्ने हो, तर उनीहरूले नै जनता भिडाउने काम गरिरहेको देखिन्छन्। यदि यस्तो प्रवृत्ति रोकिएन भने यसको असर राम्रो हुने छैन।

अहिलेको समस्या जनताजनताबीचको होइन, व्यवस्थापनकै कमजोरी हो। समयमै समाधान नगरे ठूलो संकट निम्तिन सक्छ!