काठमाडौं । नेकपा एमाले कर्णाली प्रदेश अधिवेशनका लागि भदौ ३० गते प्रतिनिधि चयन गरिने भएको छ। प्रदेश पार्टी कार्यालयमा बुधबार बसेको कार्यालय बैठकले भदौ ३० गते प्रतिनिधि छनौट गर्ने निर्णय गरेको हो।

एमाले कर्णाली प्रदेशको अधिवेशन असोज १० र ११ गते वीरेन्द्रनगरमा हुँदैछ। एमाले कर्णाली प्रदेशका अनुसार प्रदेशका १० वटा जिल्लाका ७९ वटै पालिकामा एकै दिन प्रतिनिधि चयन गरिने भएको हो।

खुलामा १०० जना पार्टी सदस्य बराबर १ जना, दलितमा ७५ जना बराबर १ जना र छनौट भएका प्रतिनिधि मध्ये एकतिहाई महिला अनिवार्य हुनुपर्ने बैठकले मापदण्ड तोकेको छ।

यस्तै, प्रतिनिधि छनौट र व्यवस्थापनको आधार भूगोलको लागि पालिका र समावेशीका लागि प्रदेश निर्वाचन क्षेत्र रहने तर, समावेशी सदस्यले क्षेत्र रोज्न पाउने अधिकार सुनिश्चित गरिएको छ। त्यसैगरी बाँकी रहेको ५० प्रतिशत अंक बराबर एकजना प्रतिनिधि थप हुने व्यवस्था गरिएको छ। कर्णालीका १० वटै जिल्लामा पार्टी संगठित सदस्यहरुको नवीकरण सकिएको छ। एमाले कर्णाली प्रदेशका अनुसार १० जिल्लाबाट गरी करीब ५ देखि ६ सयसम्मको हाराहारीमा प्रतिनिधि छनौट हुने छन्। कर्णालीमा एमालेका ५१ हजार बढी पार्टीका संगठित सदस्य छन्।