काठमाडौँ १ फागुन । प्रधानमन्त्री केपी ओली समूह नेकपाले आज शक्ति प्रदर्शनसहित ‘लुम्बिनी प्रदेशस्तरीय बृहत् सभा’ गर्दैछ ।

बुटवलस्थित् सिद्देश्वरी मैदानमा हुन लागेको सभामा प्रधानमन्त्री केपी ओलीलगायत अर्थमन्त्री विष्णु पौडेल, ऊर्जा, जलस्रोत तथा सिंचाई मन्त्री टोपबहादुर रायमाझी, उद्योग, वाणिज्य तथा आपूर्ति मन्त्री लेखराज भट्ट, लुम्बिनी प्रदेशका मुख्यमन्त्री शंकर पोखरेलले सम्बोधन गर्ने कार्यक्रम रहेको छ ।

अहिले कार्यक्रम स्थलतर्फ जुलुससहित मानिसहरु आउने क्रम जारी । सभामा लुम्बिनी प्रदेशका १२ वटा जिल्ला गरी २ लाख नागरिक उतार्ने लुम्बिनी प्रदेशका मुख्यमन्त्री एवं ओली समूहका प्रभावशाली नेता पोखरेलले दावी गरेका छन् । राजमार्ग चौराह, गोलपार्क, पश्चिम बुटवल लगायतका बिभिन्न स्थानबाट सुरु भएको जुलुस मिलनचौक हुँदै सभास्थलमा पुगेको छ ।

यसअघि ओली समहले बागमती प्रदेश कमिटीको आयोजनामा माघ २३ गते काठमाडौंस्थित नारायणहिटी दरबार संग्राहलय अगाडि सभा गरेको थियो । यस्तै, आगामी फगुन ८ गते विराटनगरमा सभा गर्ने ओली पक्षले जनाएको छ ।