काठमाडौं ९ पुस :  सत्तारुढ नेपाल कम्युनिष्ट पार्टी (नेकपा) का आज दुवै पक्षको केन्द्रीय कमिटी बैठक बस्दैछ । ओली समूहको केन्द्रीय कमिटी बैठक बालुवाटारमा र प्रचण्ड–नेपाल पक्षको बैठक साढे ११ बजे बबरमहलस्थित बार्की ब्यांक्वेटमा बस्दैछ ।

मंगलबार बसेको ओली पक्षको केन्द्रीय कमिटीको बैठकले पार्टीको विधान संशोधन गरी प्रवक्तामा प्रदीप ज्ञवालीलाई जिम्मेवारी दिएको थियो । बैठकले एक हजार १९९ जनाको महाधिवेशन आयोजक कमिटी गठन गरेको छ । मौजुदा ४४७ सदस्यीय केन्द्रीय कमिटीमा ५५६ जना थप गरिएको हो । १९६ जना थप्न बाँकी रहेको जनाइएको छ ।

यस्तै प्रचण्ड–नेपाल पक्षको बैठकले अध्यक्ष केपी शर्मा ओलीलाई अनुशासनको कारबाही गरी रिक्त स्थानमा नेता माधवकुमार नेपाललाई अध्यक्ष चयन गरेका थिए । आजको केन्द्रीय कमिटी बैठकले दुई अध्यक्षको वरीयता तोक्ने, महासचिव पदको टुंगो लगाउने स्रोतले जानकारी दिएको छ । उक्त समूहमा जनार्दन शर्मा, सुरेन्द्र पाण्डे र भीम रावल महासचिवका आकांक्षी छन् ।

प्रचण्ड–नेपाल समूहले बुधबार संसदीय दलको नेतामा प्रधानमन्त्री ओलीलाई हटाएर प्रचण्डलाई चयन गरेका थिए । पार्टी औपचारिक रुपमा विभाजन नभए पनि दुवै पक्षले पदाधिकारी चयन, संगठन विस्तार, भेला र प्रशिक्षणलाई तीव्रता दिएका छन् । नेकपाको दुबै पक्षले आफूलाई आधिकारिक दावी गर्दै आएका छन् ।