काठमाडौं, ३० मंसिर :  क्यानाडामा पनि कोरोना भाइरसविरुद्धको फाइजर–बायोएनटेक खोप लगाउने तयारी थालिएको छ । अमेरिकाले सोमबारदेखि नै आफ्ना नागरिकलाई यो खोप लगाउन शुरु गरिसकेको छ ।

क्यानाडामा पहिलो चरणको खोप आइतवार स्वदेश भित्रिएको प्रधानमन्त्री जस्टिन ट्रुडोले जानकारी दिएका छन् । सामाजिक सञ्जाल ट्वीटरमा उनले लेखेका छन्, ‘फाइजर–बायोएनटेकको कोरोना विरुद्धको खोपको पहिलो चरणको आयात गरिएको छ ।’ उनले गएको बिहीबार पहिलो चरणमा तीस हजार मात्रा खोप केही दिनमै स्वदेश भित्र्याइने जानकारी दिएका थिए ।

त्यसअघि क्यानडाको स्वास्थ्यसम्वन्धी नियमक निकायले खोप ल्याउनु उपयुक्त हुने निष्कर्ष निकाल्दै खोप ल्याउन अनुमति दिएको थियो । खोप ल्याउनका लागि आवश्यक बजेटको व्यवस्था पनि क्यानडाको केन्द्रीय सरकारले गरिसकेको छ ।

क्यानडाले यो डिसेम्बर महिना भित्रमा दुई लाख ४९ हजारभन्दा बढी खोप स्वदेश भित्र्याउँदैछ । यो खोपले एक लाख २४ हजार ५०० नागरिकलाई यसै बर्षमा सेवा दिने क्यानडा सरकारको योजना छ । कोरोना भाइरसका कारण क्यानडामा अहिलेसम्म चार लाख ६० हजार ७४३ जना सङ्क्रमित भएका छन् भने १३ हजार ४३१ जनाको मृत्यु भएको छ । ऐजेन्सी