काठमाडौं २६ मंसिर  नेपालमा पछिल्लो २४ घण्टामा थप एक हजार ४४ जनामा कोरोना भाइरस संक्रमण पुष्टि भएको छ । पछिल्लो २४ घण्टामा १,२७१ जना संक्रमित निको भएका छन् ।

पछिल्लो २४ घण्टामा काठमाडौं उपत्यकामा ५४१ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयका अनुसार उपत्यकामा ३०५ पुरुष र २३६ महिलामा संक्रमण पुष्टि भएको हो । स्वास्थ्य मन्त्रालयका अनुसार काठमाडौंमा हालसम्म ४५५४, भक्तपुरमा ३७८ र ललितपुरमा ९४४ जना सक्रिय संक्रमित छन् ।

आज ९शुक्रबार० थप ११ जना कोरोना संक्रमितको मृत्यु भएको छ । योसँगै कोरोना संक्रमित मृतकको संख्या १ हजार ६७४ पुगेको स्वास्थ्य तथा जनसंख्या मन्त्रालयले जनाएको छ । यसअघि बिहीबार १२ जना संक्रमितको मृत्यु भएको थियो । हाल नेपालमा सक्रिय संक्रमितको संख्या १२ हजार १४८ रहेको छ ।

गत २४ घण्टामा ७ हजार ४१४ जनाको पिसिआर परीक्षण भएको छ । योसँगै नेपालमा पिसिआर परीक्षण हुनेको संख्या १८ लाख २० हजार ६१८ पुगेको छ । हाल ५१९ जना क्वारेन्टाइनमा रहेको मन्त्रालयले जनाएको छ ।