धुलिखेल १४ मंसिर जिल्लाको भुम्लु गाउँपालिकामा नवर्निमित प्रहरीचौकी भवन उद्घाटन गरिएको छ ।  बागमती प्रदेश सरकारको आर्थिक सहयोगमा भुम्लु गाउँपालिका–७ को फलाटेमा बनेको नवर्निमित प्रहरी चौकी भवनको उद्घाटन बागमती प्रदेशका आन्तरिक मामिला तथा कानूनमन्त्री शालिकराम जम्कट्टेलले गर्नुभएको हो ।

फलाटे प्रहरीचौकीको भवन दुई करोड ३१ लाख ७० हजार रुपैयाँमा निर्माण सम्पन्न भएको प्रदेश प्रहरी भौतिक पूर्वाधार शाखाका प्रहरी निरीक्षक बिमलादेवी श्रेष्ठले बताउनु भयो ।  कार्यक्रममा मन्त्री जम्कट्टेलले प्रहरी नागरिकका साथी भएकाले हरेक विकास निर्माणमा शान्ति सुरक्षालाई प्राथमिकता दिनपर्ने बताउनु भयो । बागमती प्रदेश प्रहरी कार्यालय हेटौँडाका प्रमुख बसन्तकुमार लामाले बागमती प्रदेश सरकारले हरेक जिल्लाको ग्रामिण भेगमा प्रहरी चौकी निर्माण गर्ने अभियान थालेकाले अभियानमा सबै क्षेत्रले सहयोग गर्न अनुरोध गर्नुभयो ।

कार्यक्रममा बागमती प्रदेशसभाका सदस्य लक्ष्मण लम्साल, भुम्लु गाउँपालिकाका अध्यक्ष गुमानध्वज कुँवरले प्रदेश सरकारले गरेको कामको प्रसंसा गर्नुभएको थियो ।  काभ्रे जिल्लामा बागमती प्रदेश सरकारको सहयोगमा ६ प्रहरी चौकी र दुई इलाका प्रहरी कार्यालय निर्माण भैरहेको जिल्ला प्रहरी कार्यालय काभ्रेका प्रमुख रविकुमार पौडेलले बताउनु भयो । प्रहरी चौकी निर्माणका लागि जग्गा उपलब्ध गराउने दातालाई मन्त्री जम्कट्टेलले सम्मान गर्नुभएको थियो ।