धुलिखेल, २९ साउनः धुलिखेल नगरपालिका भोलीदेखि आफ्नो सबै सेवा बन्द गर्ने निर्णय गरेको छ । नगरप्रमुख अशोक कुमार ब्याञ्जु श्रेष्ठले एक विज्ञप्ति मार्फत भोलीदेखि भदौ ५ गतेसम्म अत्यावश्यक बाहेकका सबै नगरपालिकाबाट प्रदान गरिने सबै सेवाहरु बन्द हुने जानकारी गराउनुभएको हो ।

नगरपालिकाले यो अवधिमा कुनै किसिमको बैठक, गोष्ठि, भेला लगायतका कार्यमा रोक लगाएको छ । यस्तै धार्मिक स्थलहरुमा हुने दैनिक नित्य पूजा बाहेकका सबै किसिमका गतिविधि गर्न रोक लगाइएको नगरप्रमुख ब्याञ्जुले बताउनुभयो । साथै नगरपालिकाले चाडपर्व घरमै मनाउन र भौतिक दुरी कायम राखेर स्वास्थ्यका मापदण्ड पुर्णरुपमा पालना गर्न भनेको छ ।

नगरपालिकाले धुलिखेल अस्पतालका स्वास्थ्यकर्मी र अस्पताल नजिकै रहेको होटल सञ्चालकमा कोरोना संक्रमण देखिएपछि सेवा बन्द गर्ने निर्णय गरेको हो । दुई जनामा संक्रमण देखिएपछि अस्पताल वरिपरि २ सय मिटर क्षेत्रलाई कन्ट्याक ट्रेसिङको अवधिभर शिल गरिएको छ । यो अविधमा त्यस क्षेत्रमा होटल ब्यवसाय, पसल बन्द गर्न र अत्यावश्यक काम बाहेक घर बाहिर ननिस्कन नगरपालिकाले आग्रह गरेको छ ।