धुलिखेल, ११ साउनः पूर्व सञ्चार तथा सूचना प्रविधि मन्त्री गोकुल बाँस्कोटाले साँगामा यात्रुहरुले दुःख पाइरहेको भन्दै तत्काल निर्वाध रुपमा आवात जावातको ब्यवस्था मिलाउन गृह मन्त्रालयलाई आग्रह गरेका छन् । उनले सामाजिक सञ्जाल फेसबुक मार्फत साँगामा गृहमन्त्रालयले किन जात्रा देखाइरहेको भन्दै प्रश्न गरेका छन् ।

उनले बिना कारण यात्रुलाई एक किलो मिटरसम्म हिड्न बाध्य पारेको भन्दै आक्रोश पोखेका छन् । उनले लेखेका छन् ‘बच्चा केटाकेटी, बुढाबुढी एउटा बसबाट झार्ने, एक किलोमिटर हिडाउने फेरी अर्को बस चढाउने ? न चेकजाँच न अरु ? बेकारको सास्ती के उद्देश्यले यात्रुलाई दुःख दिएको ? तत्काल हटाउ ।’

लकडाउन पूर्ण रुपले खुलिसक्दा पनि काभ्रे र भक्तपुरको सिमानामा यात्रुले अनावश्यक दुःख पाइरहेका छन् । भक्तपुरको गाडीले नलिञ्चोकसम्म मात्रै ल्याइदिने गरेको छ । काभ्रेको गाडी साँगा नाकासम्म मात्रै जाने गरेको छ । यो बीचको दूरीमा यात्रुहरु पैदल नै हिड्न बाध्य छन् । साँगा पूर्व मन्त्री बाँस्कोटा निर्वाचित क्षेत्र समेत हो ।

साँगामा भक्तपुरतर्फ सशस्त्र प्रहरी र काभ्रेतर्फ नेपाल प्रहरीको टोली तैनाथ गरिएको छ । उनीहरुले यात्रुको भन्दा पनि सवारीको चेकजाँच गर्ने गरेका छन् । यात्रुहरुले राजधानीसँग सबैभन्दा नजिकको जिल्ला काभ्रे अन्तर्गत चल्ने सवारी साधनलाई राजधानी प्रवेश गर्न दिन माग गरेका छन् ।