धुलिखेल, २७ असारः भक्तपुर क्यान्सर अस्पतालको गम्भीर लापर्बाहिले काभ्रेको बनेपा नगरपालिका वडा नम्बर ६ पुरै त्रसित बनेको छ । वडा नम्बर ६ बुडोलकी २४ बर्षीय युवतीलाई अस्पतालले कोरोना नेगेटिभ भएको रिपोर्ट थमाउँदै घर पठाइदिएको थियो । तर त्यसको पाँचदिन पछि कोरोना नेगेटिभ भन्दै घर आएइपुगेकी युवतीलाई कोरोना संक्रमण पुष्टि भएको सूचीमा जिल्ला स्वास्थ्य कार्यालय काभ्रेले राखेको छ ।

जिल्ला कमाण्ड पोष्टले दैनिक पठाउने विवरणमा ती युवतीको १९ गते स्वाब संकलन गरिएको र २२ गते आएको रिपोर्टमा कोरोना पुष्टि भएको उल्लेख गरिएको छ । विवरणमा यो पनि भनिएको छ कि ‘खोज पडताल गरि ती युवतीलाई शीर मेमोरियल अस्पतालमा उपचालका लागि पठाइएको ।’

यो वाक्यले कोरोना संक्रमित युवती फरार थिइन् र प्रहरी प्रशासनले खोजी गरी भेटाएको अर्थ लाग्छ । जिम्मेवार निकायमा बस्ने ब्यक्तिहरुले आफ्नो गल्ती ढाकछोप गर्न प्रयोग गर्ने शब्द ती युवती माथि पनि लगाइएको छ । जब कि ती युवती आफुलाई कोरोना संक्रमण नभएको अस्पतालको आधिकारिक रिपोर्ट सहित खुशी हुदैँ आफ्नै घरमा आएकी थिइन् ।

पाँचदिनपछि कसरी युवतीमा कोरोना संक्रमण देखियो ?
ती युवतीमा पाँचदिनपछि कोरोना संक्रमण पुष्टि भएको भने होइन् । संक्रमित युवती आमा स्वास्थ्य जाँचका लागि भक्तपुर क्यान्सर अस्पतालमा पुगेकी थिइन् ।

कुरुवा बसेका मध्येकै अर्का एक जनामा कोरोना पुष्टि भएपछि अस्पताल सिल गरेर सबै कुरुवा र बिरामीको स्वाब परीक्षण गरिएको थियो । असार २२ गतेको रिपोर्टमा नै ती युवातीमा संक्रमण पुष्टि भएको थियो ।

तर अस्पतालले बुडोलकी युवतीलाई संक्रमण नभएको रिपोर्ट दियो र अर्का कुरुवालाई संक्रमित भएको रिपोर्ट थमायो । वडाध्यक्ष सचितानन्द केसीका अनुसार नाम र उमेर एउटै भएका कारण रिपोर्ट साटिन गएको अस्पतालले जनाएको छ ।

युवतीको यात्रा मासु पसल देखि टोल छरछिमेकसम्म
अस्पतालमा आमाको कुरुवा बसेर कोरोना नभएको रिपोर्ट पछि खुशी हुदैँ आफ्नो घर बुडोल आइपुगेकी ती युवती मासु देखि तरकारी पसलसम्म पुगेको पाइएको छ । युवतीको घर परिवारका सदस्यलाई होम क्वारेन्टाइनमा बस्न भनिएको छ ।

प्राप्त विवरण अनुसार ती युवाती दूध डेरीमा समेत पुगेकी थिइन् । उनी घर आएपछि पनि छरछिमेकमा समेत डुल्ने, घुम्ने र साथी भाइसँग भेटघाट गरेको पाइएको छ ।

जिम्मेवार निकायबाटै हुने यता त्रृटिले समुदाय नै त्रासित बनेको छ । वडा कार्यालयले आफ्नो क्षेत्र सिल गरेको छ ।