धुलिखेल, १४ असारः पनौती नगरपालिकाले बाली बीमा बारे नागरिकलाई टोल टोलमै पुगेर बुझाउने कामलाई अभियानकै रुपमा अघि बढाएको छ । जेठ १४ गते आएको भिषण बर्षासँगैको बाढीले कृषि क्षेत्रमा करोडौँ क्षति ब्यहोरेको नगपालिकाले बाली बीमाका बारे थप बुझाउन थालेको हो ।

विपद् तथा विभिन्न संक्रमणका कारण किसानलाई पर्न जाने नोक्सान कम गराउन बाली बीमा अभियान सञ्चालन गरिएको उपप्रमुख गिता बञ्जारले जानकारी दिनुभयो । आज वडा नं ११ र १२ का २५÷२५ जना किसानलाई भेला गराएर अन्तरक्रिया गरिएको छ ।

यसअघि वडा नं १, ९ र १० का किसानलाई पनि बाली बीमाको फाइदाका विषयमा अन्तरक्रिया गराइएको थियो । बाँकी रहेका वडाका किसानहरुलाई पनि क्रमश बाली बीमाका बारे जानकारी गराउने उपप्रमुख बञ्जारले बताए ।

नगरपालिकाले आगामी आर्थिक वर्षका लागि पशुपन्छी तथा बाली बीमा गर्ने किसानलाई प्रिमियम रकमको ५० प्रतिशत अनुदान दिने नीतिगत रुपमै ब्यवस्था गरेको नगरप्रमुख भिम प्रसाद न्यौपानेले बताए ।