धुलिखेल, १३ असारः आज बिहान मात्रै भारतसँग सिमाना जोडिएको जिल्लामा देखिएको सलह किरा काभ्रेको विकट डाँडापारी क्षेत्रमा पनि देखिएको स्थानीयहरुले बताएका छन् । फट्याङ्ग्रा जस्तै देखिने सलह किरा देखिएको स्थानीयबासीले आशंका गरेका छन् ।

खानीखोला गाउँपालिकाको वडा नं २ फलामेटारमा सलह जस्तै देखिने किरा दिउँसो २ बजेतिर आकाशमा देखिएको थियो । अहिले त्यो किरा वडा नं १, २ र ६ को माथिल्लो भेगमा देखिएको पालिकाका प्रवक्ता मान बहादुर गोलेले जानकारी दिए ।

केही किरा मरेर भुइमा झरेको स्थानीयले बताएका छन् । देख्दा सलह जस्तै देखिएकाले सलह हो वा होइन भन्ने विषयमा गाउँपालिकाका कृषि प्राविधिकहरुले अनुसन्धान गरिरहेको प्रवक्ता गोलेले बताउनुभयो ।

किराले बालीमा भने कुनै क्षति नगरेको बताइएको छ । किरा मकवानपुर हुदैँ गाउँपालिका भित्रिएको हुन सक्ने प्रबक्ता गोलेको भनाई छ ।